現年39歲嘅官恩娜（Ella），15年年初同中法混血醫生Juan-Domingo Maurellet結婚後，隨即造人成功，同年年尾已誕下囝囝Gabriell（bébé G），本來去年打算復工錄歌嘅Ella，突然宣佈再有喜，結果三年抱兩，囡囡今年一月出世，今個月16日剛滿8個月。
目前全力相夫教子嘅Ella，不時都會喺社交網分享佢嘅湊B生活，噚日同今日佢都喺Ig Story貼湊囡相，一時話自己湊囡搞到頭都冇時間梳…
一時又扁晒嘴問外婆橋喺邊，點解搖極都未到，笑囡囡搖極都唔瞓。
今日佢又放咗條片氹女瞓覺嘅相，囡囡Aurelie(BéBé A)用手㩒住Ella個胸瞓得好舒服。
後來Ella忍唔住捉住囡囡手仔錫，搞到囡囡差啲醒，十分可愛。
此外，Ella日前貼咗一張BéBé A食提子嘅相，同其他家長分享一下要注意嘅地方，佢留言話：「今日妹妹第一次食提子，令我諗起妹妹出世之前特登再上一次兒童嬰兒急救班，仲叫埋屋企個姐姐上堂，萬一有緊急情況佢都知道要點處理，覺得都幾有用，而且令自己對照顧小朋友更有信心。」
Ella續謂：「好想同大家分享下老師嘅說話，因為我發現原來有好多人都唔知道，每次見到個心都會離一離！提子、爆谷、藍苺、蘋果係Choking hazard 高危食物! 食嘅時候要小心處理! 提子藍莓最好切成4分長形，年幼嘅小朋友最好唔好食爆谷，蘋果係遇水會發脹嘅生果要切細去皮先俾小朋友食！老師話佢做急救咁多年，成日見小朋友比呢幾樣野哽親，甚至失去寶貴嘅性命，所以要多加注意!」
（apple daily）
