【曾與陳慧琳合唱】突然暴瘦70磅

曾於10幾年前來港發展,更作歌俾天后陳慧琳(Kelly),又同過Kelly合唱《再見北極雪》,近年多喺大陸發展,已經好耐冇見過佢。不過,近日喺網絡流傳他肝癌猝死,今日聯絡過台灣男唱作人、有「情歌教父」之稱嘅周傳雄(小剛)方面,其大陸經理人公司回覆稱:「周傳雄老師身體非常好,謝謝關心。感謝。」

現年49歲嘅小剛,於2011年起受胃病困擾,身高1.78米(約5呎10吋)嘅佢,由176磅暴瘦至108磅,情況令人擔心,後來喺老婆Vivian嘅細心調理下,體重回升至132磅。

據台灣《蘋果》報道,小剛以前喺台灣嘅經理人公司幫手打去大陸問小剛嘅助手,對方否認小剛病逝消息,仲話後日(10月2日)有商演。小剛嘅助理仲透露小剛近年搬去上海,胃病方面有定期覆診,接近痊癒,目前飲食正常,甚至已經可以開始飲酒,力證小剛身體冇問題。

小剛曾來港發展,先後為陳慧琳及李克勤等香港歌手作歌,後來轉戰大陸,擔任過第二屆《超級星光大道》評審等。

 

 

(apple daily)