【慘被囡囡噴便便】新手爸爸陳柏宇硬食:抱得舒服先會噴

剛為人父嘅陳柏宇,今日出席活動時表示自己一直幫手湊女,提到早前幫BB換片時,BB竟然噴屎回敬,Jason就笑言好彩有運動細胞所以避得開:「可能抽起佢pat pat,所以好容易放屎,依家學識喇,唔會將pat pat舉得咁高,其實都試過兩次,避到一次避唔到第二次,件衫有中到便便。(係咪你抱得唔舒服?)應該係抱得舒服先會噴,不過佢好似冇向媽媽噴過,有啲朋友係家長話係正常經歷嚟嘅。」

Jason話依家有時負責夜晚餵奶、朝早就由陪月湊,至於其他時間則係太太符曉薇湊。
問佢邊樣覺得最難?佢就話:「暫時未試沖涼,因為依家有陪月,日日都係佢幫BB沖,  之後陪月放假,可能就由我哋嚟沖,不過若然BB唔係成日出街,都唔使日日沖,有啲分泌油脂都可能會令BB皮膚好啲,只要下體排洩物位置清潔得乾淨就得,唔一定要落水沖。」

有女萬事足嘅佢,被問到會唔會錫囡囡多過太太,佢就話:「唔會,唔會用呢啲嘢嚟相比。呢排BB啱啱出世,影多啲相係人之常情,我哋一家三口嘅相已經影咗,晏啲post上ig俾大家睇。」

 

 

 

(on.cc / apple daily)