【差啲喺的士生B】完全冇落麻醉藥:痛到嗌救命

「去到半夜,醫生話我可以生,但我真係想囝囝同我同一日生日,所以一直話再等等,等要18號先至生,真係好難得!呢個美麗嘅時刻,將來一定會同囝囝分享。」

名模Rosemary上月18日誕下兒子,BB幸運地同媽咪同一日生日。而BB出世至今只有廿日,Rosemary仲坐緊月,但Rosemary已急不及待要帶囝囝出街見吓「世面」。日前佢哋一家三口去咗海灘影溫馨全家福,相當sweet!

Rosemary產後首次受訪,佢話囝囝叫Hendrix Swamy,9月18日零晨1點11分出世,重3.5kg,佢話:「囝囝好健康,樣樣都好好,好乖!食得又瞓得。(你有覺好瞓?)我有餵人奶,半夜嗰餐之前會揼定,而且有請陪月,所以唔係好辛苦。同埋我同老公都一見到囝囝就開心,適逢係假期,所以第一次帶佢出街去飲茶、公園,海灘影相。」

提到同囝囝同一日生日,Rosemary更是雀躍,但佢話生之前都有少少擔心囝囝早咗出世:「我生之前嗰日就係颱風『山竹』擊港,打風後有好多樹冧咗,搞到好塞車,我用咗兩個幾鐘頭先去到醫院。(擔唔擔心喺車度生?)好多事都可能發生,我唔敢諗,我真係有個朋友喺的士生,去到醫院都痛咗十個鐘。初初都仲接受到,後來嗰種痛真係冇任何嘢可以比,而且我完全冇落麻醉藥,真係痛到嗌救命,不停自己催眠唔痛。去到半夜,醫生話我可以生,但我真係想囝囝同我同一日生日,所以一直話再等等,等要18號先至生,真係好難得!呢個美麗嘅時刻,將來一定會同囝囝分享。」

(on.cc東網)