【陸永超有心思】Reina:從來未收過咁sweet 嘅生日禮物

農夫成員陸永不嬲都係愛妻號,老婆大人Reina生日,真係少啲心思都嫌自己唔夠誠意,送花送蛋糕當然要做足,不過佢就話有份神秘禮物,依家都仲未用到,咁呢份禮物係乜呢?

原來Reina已經喺ig公開咗老公送咩禮物畀佢:

第一份係單反相機連鏡頭,陸永仲報埋攝影班添,方便佢哋幫兩個女影到見得人嘅相;第二份禮物就勁有心思……原來陸永係冇車牌,為咗老婆以後唔使咁頻撲,就的起心肝學揸車,以後唔使老婆做「柴可夫」啦!Reina留言話:「從來未收過咁sweet 嘅生日禮物!『老婆,你講得啱,我係應該幫你同兩個女影多啲見得人嘅相,所以我買咗部相機報埋個攝影班!』『日日見你咁頻撲,好攰好眼瞓,想幫輕下你又無能為力,所以鼓起勇氣去學揸車!』好貼心嘅生日禮物,多謝陸生!」

陸永又賣晒口乖,留言話老婆已經28歲,但仲好似18歲咁,令人妒忌,仲Hashtag自嘲:「似唔似一個阿叔攬住個𡃁妹!」Well~你由到到尾都係想讚老婆後生啫!

(on.cc東網)