【陸太懵然不知】苟芸慧陸漢洋親認已秘密註冊

「處女黨」最後一個成員35歲苟芸慧原來上月18日已經靜雞雞做咗人妻,跟老公陸漢洋(William)在加拿大舉行神秘婚禮,只邀請新娘在多倫多嘅家人同舊同學參加,場面溫馨又驚喜,令苟姑娘十分感動,本周五(19日),一對新人在香港補擺喜酒。

原來當日苟姑娘想婚前返多倫多探家人,因為有長輩未能來港出席婚禮,希望帶未婚夫拜見長輩盡禮數,體貼嘅陸漢洋知道後,即偷偷地安排一個驚喜給女友,因為苟姑娘一直想在古堡行禮,所以佢鎖定了在多倫多唯一一個古堡內舉行婚禮,搵了未來外父、弟弟同加拿大認識超過20年嘅舊同學Andrew和Tom幫手,仲有加拿大契姐Winnie陪佢炮製驚喜。

當婚禮舉行時,苟姑娘感動到喜極而泣,宣讀誓言流下開心淚水,苟姑娘表示:「呢個係一個好溫馨嘅婚禮,其實我覺得佢之前已經古靈精怪,不過佢一向都係咁,所以冇理會。婚禮嗰日早上,原來佢將婚紗帶到多倫多,我哋去了影相,我仲以為只是去影結婚相,心諗呢個應該係佢畀我嘅驚喜了。之後我哋去到婚禮現場,才知道原來真係一個婚禮。」

苟姑娘見到近10年冇見過嘅長輩、朋友們專誠嚟出席,真係好開心好感動,苟姑娘甜漏漏表示:「最感動係William在婚禮上獻唱《Nothing’s gonna change my love for you》,我同爸爸跳舞,一邊跳一邊見到爸爸熱淚盈眶,覺得爸爸真係會放心把我交到William手上。」


除了驚喜婚禮外,William亦為老婆做咗好多不可能嘅任務。苟姑娘表示:「William唔識跳社交舞,之前特別為咗我一齊去學,仲刻意着皮鞋練習。雖然佢跳起舞來好似機械人,但佢為我放低咗平時愛型嘅性格,很難唔感到佢嘅誠意。」

而William覺得多倫多係太太成長地方,知道佢一定很希望當地親友分享喜悅,所以用盡方法搵老婆嘅舊同學出席婚禮。而婚禮期間遇上颱風《山竹》襲港,佢安排化妝師飛往加拿大,但遇上班機延誤要先飛澳洲再飛多倫多,另一位兄弟亦趕及風後第一班機飛往參加婚禮。陸漢洋表示:「好感激上天嘅安排,我哋希望見到啲朋友都能夠出席,我和Christine都好開心。」佢仲承認兩人已註冊係合法夫妻,註冊地點就保秘。

 

 

(apple daily / on.cc)