婚後育有一子，眨吓眼仔仔已經6歲大，仲憑住古靈精怪個性深得網民歡心！不過，Leanne今日喺社交網上載幾張囝囝右眼包住紗布嘅相，仲留言話囝囝杜杜唔小心畀鉛筆插傷眼！
Leanne留言表示：「上星期收到好多朋友慰問 問關於杜杜點解變左（咗）單眼杜 唉 真係一個低級錯誤 以前成日聽啲長輩講 要小心啲鉛筆插眼啊 我成日都覺得小心啲就得架（㗎）喇 點知 就發生左（咗）係（喺）杜杜身上 今次算好好好彩 係視網膜花左（咗）小小 滴眼藥水同塗藥膏就好返（番） 呢個係對杜杜黎（嚟）講一個好好既（嘅）教訓」
樂隊Mr.鼓手Tom同「陽光妹」何思諺（Leanne），6年前只係拍拖三個月就奉子閃婚，當年只有24歲嘅Tom同21歲嘅Leanne並不被外間睇好。
當年Leanne拍檸檬茶廣告而成名，但紅咗無耐就奉子成婚，慢慢退出娛樂圈。
不過呢對90後夫妻憑住堅定嘅信念以行動嚟證明彼此嘅愛，依家仲成為外界眼中嘅恩愛夫妻添！
囝囝以趣怪見稱，今年剛剛升上小一。
媽媽Leanne攝影作品，父子開學日合照，一家三口由不被外界看好，到而家一家三口幸福到令人羡慕！
媽媽Leanne又叫大家放心，因為杜杜已經好番：「個（嗰）幾日佢睇唔到野（嘢） 大部分時間都合上眼睛 而我一直都係（喺）佢身邊 睇下（吓）佢有咩需要 又講下（吓）故事比（畀）佢聽啦 比（畀）啲音樂佢聽啦 有幾次佢捉住我隻手同我講：『媽咪～你放心啦我好快無事架（㗎）喇～』唉 講真 我寧願受傷個（嗰）個係我 嗚嗚嗚 我都會繼續觀察一下有無後遺症 呢幾日真係無覺好訓（瞓）嗚哇 身心交瘁啊 養兒一百歲長憂九十九 明啊明啊明啊」Leanne仲爆杜杜睇醫生時企喺度瞓着咗，下次要小心啲啦杜杜！
杜杜以後要小心喇！唔好再令爸爸媽媽擔心~
而爸爸Tom接受訪問時，指囝囝的視網膜受損已痊愈，叫大家不用擔心：「囝囝平時好鍾意畫嘢，又成日變魔術，上星期佢自己玩畫畫時，可能畫得太開心，唔小心拮親隻眼，視網膜花咗啲，不過搽咗藥膏、滴咗眼藥水已經好番，睇嘢冇問題。我個仔唔係曳嘅，我細個仲曳，試過撼穿頭，不過個個細路仔都係咁㗎啦。」問到是否好心痛？他說：「梗係啦，因為隻眼損咗係好痛，痛咗三日。」他又說已叫囝囝玩時凡事小心，不要再誤傷自己。
(綜合報道 / on.cc)
