【激罕再合體!】林峯吳君如古巨基方中信等到賀

    再度合體,另外仲有好友傅明憲、吳君如、基仔老婆Lorraine、林峯、方中信同老婆莫可欣、鮑起靜同老公方平等等,竟然仲有。。。

    無綫90年代「新五虎」古天樂、古巨基、吳家樂、劉愷威同何遠恒,今年5月喺基仔紅館個唱Re-U,仲合唱咗首《當年情》,反應極之熱烈。

    古仔聽日48歲生日,大班好友噚晚同古仔慶祝,「新五虎」又再度合體,另外仲有古仔好友傅明憲、吳君如、基仔老婆Lorraine、林峯、方中信同老婆莫可欣、鮑起靜同老公方平等等,仲有一個,似乎係今年先見到佢喺古仔生日party出現,就係ViuTV總經理魯庭暉。

    其實古仔近年成日同ViuTV合作,好似舊年古仔上ViuTV嘅《鮮浪潮語》,今年又支持《全民造星》,所以魯庭暉出現古仔生日P,真係一啲都唔出奇。只不過,就不期然令人諗起2年前古仔生日P,出席嘅容祖兒(Joey)玩facebook live,飲到半醉嘅古仔突然爆咗句話:「我希望ViuTV個乞兒呢……」現場嘩聲四起,一味儍笑嘅古仔隨即補鑊話:「係呢……係飛黃騰達嘅!」

    不過,事後古仔出席活動,都有解釋番點解講「ViuTV個乞兒」,當日佢話:「個朋友話畀我知,接拍ViuTV一個節目,客串個角色,開頭佢同ViuTV講冇期,就唔啱時間,點知ViuTV就咗佢幾次都就到個期畀佢,我就問個朋友『乜個節目好重要嘅咩?個角色你做啲乜?』朋友就答我係做乞兒,我就話『咁你飛黃騰達啦,可以憑個角色上位。』我個朋友唔係圈中人,所以我冇開名講佢。乞兒係我朋友嘅角色。」

    聽聞呢件事係千真萬確,古仔唔係鬧ViuTV,而係笑佢一個幫ViuTV客串嘅幕後朋友,如果唔係,近年ViuTV同古仔都唔會有咁多合作啦!

    (Apple daily)

    SHARE