43歲萬人迷碧咸（David Beckham）同前辣妹（Spice Girls）成員Victoria擁有4個仔女，係個典型大家庭，外人眼中仲非常幸褔。
但最近碧咸接受訪問時，就談及維繫呢段婚姻原來一啲都唔容易。
二人結婚19年來，都傳過好多次婚變消息，雖然二人即刻否認，但碧咸就於訪問中承認呢段婚姻都有艱難時刻：「要好似我哋而家結婚咁耐，永遠都需要下苦功，其後又變得有啲複雜。」
又講到做爸爸亦唔容易：「有時好少嘅事會造成好大分別，我於自己嘅小朋友身上察覺到呢點。」
不少人即再次指二人情已逝！
雖然呢個只係訪問預告，但已經引起好多觀眾關注，碧咸仲話自己人生中只有一件事後悔，至於係乜就要等節目出街先揭曉喇。
Victoria就於少理傳聞，近日於社交網Instagram分享自己去到豪華水療中心度假的照片，只見她風騷晒靚景與靚樣，似乎心情靚爆！據了解該水療中心主打令人放鬆身心，當中有減肥與排毒套餐，分分鐘索價17,500英鎊（約17.9萬港元），未知Victoria有冇揼本氹自己開心？
(on.cc/apple daily)
