【咁快?】森美已經見過未來新抱!?

    藝人森美出席活動,小時候患有專注力失調和過度活躍的他,希望用自身經歷為有問題的學生打氣,他表示:「之前都有去啲學校探訪,有一、兩個學生聽完我分享都感動落淚,我同佢哋講要相信自己,我細個讀唔到書嘅一段時間都辛苦,補習老師教到要搣我,阿媽都打我,成日都唔合格,我連功課都做唔好。」

    問到仔女可有他這個問題?他笑言:「好在我太太冇,揀一個好嘅另一半好重要。」講到仔女生性讀書又叻,他表示:「讀書叻唔叻只係排第二,最重要係畀佢哋搵到鍾意做嘅嘢同埋有成功感,佢哋細個想學乜都畀佢哋試。」

    講到他思想開明,可會畀仔女拍拖?他表示:「佢哋5、6年班時,我已經有問佢哋有冇鍾意嘅人,愛情嘅感覺係控制唔到,如果你成日話唔好,佢就會講都唔講你聽,有時愛錯、唔識拍拖、唔識愛人,感覺係好差,愛一個人係要學識點相處。」隨即笑言:「所以我會畀佢鍾意人,但唔會畀佢咁快拍拖。」他又自爆14歲的仔仔在5、6年班時,有個很好的女仔朋友:「我就約嗰家人一齊食飯,到依家都會約出嚟玩,個仔話佢哋唔係拍拖,但逢放假我都會叫佢哋去街。(咁快見「未來新抱」?)如果係咪早啲見,唔係咪係朋友,教佢鍾意一個女仔可以同佢相處多啲,係咪拍拖就遲啲先算。」

     

     

     

    (on.cc)

    SHARE