【Kary催結婚生仔】Stephy陪Miki一齊佗B

    鄧麗欣(Stephy)自從認愛邱勝翊(王子)之後,成個人都變得甜甜蜜蜜,仲不時放下閃咁,真係幸福爆登。

    網民仲捕獲過佢哋拍拖行街,一黑一白真係超襯啊!

    首PO情侶檔合照就迅速吸過萬Like!

    早前Stephy生日,王子更精心為女友準備咗一個驚喜生日P,睇下Stephy笑得咁冧就知佢幾開心啦~

    吳雨霏(Kary)更指Stephy依家同男友出雙入對分唔開,Stephy聽到之後就笑笑口咁話:「好姊妹係用嚟出賣朋友。」

    鄧麗欣(Stephy)、張繼聰、陳靜(DaDa)、邵音音、林敏驄、蘇麗珊、夏嫣、導演泰迪羅賓及莊端兒等,噚晚係銅鑼灣出席電影《八步半喜怒哀樂》首映禮。

    Stephy戲中有背部半裸演出,佢話原先冇呢場戲,喺拍攝時導演話佢個背脊好靚建議加一個鏡頭,而拍攝時係有清場嘅,Stephy笑話:「冇考慮太多,因為相信導演,現場環境恐怖加埋我露背一樣恐怖。」

    Stephy認為今次演出係自己暫時最性感嘅底線,都應該係男朋友邱勝翊(王子)可接受嘅底線:「之前冇問過佢,因為臨時先決定拍,佢有睇過劇照,冇特別講嘢,我覺得拍得幾靚,佢都唔會反對。我哋唔會刻意問對方,會互相尊重。」

    問到Stephy會否限制王子拍親熱戲,佢話:「唔會,我都唔想自己有限制。如果佢拍親熱戲,我可能選擇唔睇。」

    講到Kary催佢結婚生仔,Stephy就話:「佢成日催呢樣催嗰樣最叻,唔會太快,拍下拖先。」

    對於Miki再度有喜,Stephy表示早前與對方食飯已經知道,覺得Miki好幸福:「等佢有第三個嘅時候,我陪佢。」

    (綜合報道/Apple Daily)

    SHARE