【雯女話自己有散光】 佘詩曼轉哂口風

佘詩曼、周家蔚、林奕匡太太李靄璣等,昨晚喺中環出席一個品牌活動,阿佘着住條貼身裙出嚟,騷長腿。

之前阿佘接受大陸《魯豫有約一日行》節目訪問時,曾經提到有一年台慶,阿佘同佢個對手一齊企,當時阿佘見到前面發生咗一樣好好笑嘅嘢。

於是佢就擰轉頭同佢對手講:「嘩,你睇!」

但對手完全唔理佢,直頭當阿佘透明一樣。

雯女到灣仔出席頒獎禮,受訪時被傳媒追問佢是否就係嗰個「白眼對手」,雯女笑:「係咩?我散光0架喎!就算有人白眼我,我都唔知。」亦否認係白眼/無視阿佘嗰位女演員。那平時同阿佘有冇偈傾?「其實我哋係學姐學妹嚟0架,因為我哋係協恩嘅校友,有時都會同我聯絡,講有關學校嘅嘢,早前有個老師想搵我,阿佘都有同我講。」否認不和。

昨日輪到阿佘回應,佢話:「嗰個一定唔係雯女,因為佢係我一個好欣賞嘅演員,加上亦係我師姐,同我一間學校,所以大家唔好有咁多誤會。」

咁點解忽然重提舊事?阿佘稱:「因為自己上個清談節目,主持問我有冇類似遇過咁嘅情況,所以我先至講呢件事,但目的唔係要傷害任何人。因為你上到個節目,如果乜都話冇冇冇,咁唔係一個有趣嘅訪問。」

阿佘再謂:「成件事已經咁多年前,自己亦唔係要開名講邊個,咁多年之後,依家同『嗰個人』好好關係。人總係有成長嘅,大家後生嗰時可能都唔懂事。」咁『嗰個人』有冇合作過?佢話:「有合作過。」

咁依家係咪冇人敢對你白眼?阿佘笑道:「如果你想人點對你,首先就要你點樣待人。要善待任何一個人。」如果你依家畀人白眼,會點?佢話:「我會整到佢笑為止。」

此外,阿佘憑《延禧攻略》角逐華鼎獎最佳女配角,阿佘話好開心,係意料之外嘅事:「自己覺得攞唔攞獎唔重要,第一次演奸角,得到大家認同,之前最擔心大家會討厭個角色,但知道大家中意就開心啦。」係咪事前擔心演奸角反應唔好,阿佘話:「依家時代唔同。」

阿佘曾謂因拍《金枝慾孽》做奸角而痛失月餅廣告,咁依家拍完《延禧》係咪多咗廣告?阿佘笑住話:「OK啦。」咁會唔會再演奸角:「見好就收啦,唔好住。」

(Apple daily)