【講到囡囡⋯】郭羨妮:好大壓力

    前港姐郭羨妮(Sonija)與中國大陸動作導演朱少傑於2011年低調結婚,婚後育有一女Kylie。

    結婚咁多年一直都咁恩愛!之前Sonija話過想再追多個B,不過因為老公工作好忙,搞到冇時間造人。

    郭羨妮呢日為慈善跑主持起步禮,她透露該活動是受加拿大人Terry Fox的啟發而創立的籌款活動,她說:「原來Terry Fox都係同我讀同一間大學,算係我師兄。」

    Sonija指以前有跑步,但自從生完囡囡就未有再跑:「膝頭好易受傷,唔知係咪因為鈣質流失。我有做瑜伽,囡囡都有同我一齊做。囡囡有學Jazz同體操,佢好有跳舞細胞、跳得好犀利,我只係做觀眾,有時佢會迫我哋跳,但我哋個個好老態咁坐喺度。佢以前會掛住跳舞,唔願做功課,依家升上小一就好啲,不過我每日都會幫佢睇功課,睇吓有乜甩漏,好大壓力、好似我讀番小一咁。(安排囡囡好似你咁去加拿大讀書?)有咁嘅計劃,但等大學先。(再去參加選美?)又唔一定要。」

    考慮再拍劇

    Sonija稱除湊女外亦不時出席活動,問到會否再拍劇?她坦言有戲癮,但要待女兒可以自己處理功課才考慮:「佢剛剛小一,等多幾年,等佢可以自己做功課先。都有人搵過我拍劇,但我推咗,有啲角色都幾好,可惜時間太長。」

    對藍潔瑛逝世感到愕然

    對於藍潔瑛逝世,Sonija稱未有合作過,亦不認識對方:「我以前都有睇佢拍嘅劇,覺得佢古裝造型好靚,我一直好希望佢出番嚟工作。(覺得可惜?)好愕然,所以身體健康好重要。」

    (on.cc)

    SHARE