歌手鄧紫棋（G.E.M.）喺2015年講過自己有機會「升空」，成為翱翔太空嘅華人歌手第一人，仲話會飛到荷蘭接受連串訓練，不過之後呢個升空旅程一直冇晒消息，有關方面仲話升空計劃遇上問題，總之就一直只聞樓梯響啦！
不過相隔3年後，G.E.M.就喺社交網話自己應邀到美國太空總署於矽谷興建嘅Ames研究中心出席有「科學界奧斯卡」之稱嘅「科學突破獎」頒獎典禮，更會在台上演唱自己嘅原創中文歌《光年之外》，成功為港爭光！
今日，佢終於抵達美國太空總署（NASA），仲留言：「宇宙GEM終於踏足NASA🙈 First time visiting NASA Ames Research Center！😎」相中佢笑得相當開心，仲舉埋V字，心情好興奮！網民都話似乎佢想上太空嘅夢一直都未變過呀！
「科學突破獎」並唔係純粹科學界嘅盛事，不少荷里活明星亦於紅地氈環節中亮相，去年女星Mila Kunis、Lily Collins、男星摩根費曼（Morgan Freeman）和歌手Wiz Khalifa亦有到場支持，至於港人熟悉、曾喺電影《破風》嘅歐陽娜娜更有份喺台上演奏大提琴，成為首位「科學突破獎」嘅華人表演嘉賓。
(on.cc)
