歌手鄧紫棋（G.E.M.）前日喺美國太空總署（NASA）出席「科學突破獎」頒獎典禮，仲壓軸獻唱中文歌。
G.E.M.連日嚟都喺Instagram洗版分享集郵成果，包括美國樂壇歌王Lionel Richie、型男奧蘭度布林（Orlando Bloom）等巨星。
今日G.E.M.又喺IG晒相，而且係佢首次公開晒同男友Mark嘅合照，仲留言寫住︰「最後一張～Styled by @markymark.23 #lastbutnotleast（最後但同樣重要的人）」
佢男友係幫佢執形象嘅造型師Mark Ngai，穿上黑西裝同G.E.M.白色長裙禮服，一黑一白頗相襯。而G.E.M.喺下面註明「lastbutnotleast」，講明最後但唔係唔重要。
獲女友親證地位嘅Mark亦不斷上載「男友視角」片段隔空傳情，網民都紛紛送上祝福，又叫Mark要好好照顧G.E.M.呀！而「鄧紫棋首晒男友」更登上微博熱搜第一位添！
其實G.E.M.於2016年已經同Mark傳緋聞，之後又被拍到兩人同遊日本，今年更多次拍到二人出雙入對，但G.E.M.一直未有承認，睇嚟G.E.M.今次正式公開二人嘅情侶關係。
(綜合報道)
