尋晚《美女廚房》搵嚟三Pair閨蜜包括姚子羚及胡蓓蔚、蔚雨芯及鄺潔楹、許靖韻及曾樂彤落廚，當中合拍度同廚藝最好嘅唔使睇都估到係「姚胡」喇！
一開始三組要整亞枝竹椰汁五穀米，入世未深嘅許靖韻係咁話個亞枝竹入面有好多毛，清唔到，嘉賓洪天明就突然問子羚：「裏面啲毛呀，有冇清毛呀？」淡定嘅子羚神回：「清咗㗎喇，同我一樣都剃咗，放心！」估唔到尺度咁大，搞到全場男士嘩然！嚇親大家嘅子羚就補番句：「我講胳肋底毛啫！」
而子羚仲親餵張振朗食嘢，仲大爆對方鍾意姐姐，即刻令人諗起佢緋聞女友胡定欣呀！
而「姚胡」仲大晒甜蜜，話錫就錫，化身接吻魚當眾咀嘴，最後就以118.5分大幅拋離對手，穩奪美女廚神寶座！
(on.cc)
