歌手陳柏宇（Jason）「有女萬事足」。
不時上載囡囡相同網民分享
點知今日就比老婆符曉薇（Leanne）喺社交網度公審！
囡囡Abigail絕對係一個不折不扣嘅表情王，每張相見佢都唔同表情，一時擘大口、一時又皺晒眉。
媽咪Leanne都忍唔住留言︰「想正正經經同abi影相係好難，究竟佢有幾多個表情呢？長期扭曲自己樣貌。」認真爆笑！ 
日前佢哋一家三口出街放電兼影全家福，Leanne發現Jason偷偷趁自己唔覺意，公然錫囡囡Abigail個嘴仔，佢就即刻拍下「罪證」，即時嬲爆發文！
「To abi 連媽咪我都忍口，唔敢錫你個嘴仔，怕有細菌，點知！呢個男人光天化日就係咁錫你嘅嘴仔，仲成日同我講唔可以阻止佢，希望你長大後睇到呢個post，你睇媽咪幾保護你，你睇爹哋幾滿足佢自己嘅慾望！」就係呢張罪證！
净係睇堆字都感受得到媽咪Leanne有幾火，就連一班網民都睇唔過眼，勁撐Leanne！網民留言話「陳生真喺要好好教育下」、「爸爸可唔可以冷靜少少」、「真係唔可以㗎」、「咁唔係愛係自私。事事小心」、「其實要錫都唔一定要錫個嘴㗎嘛」、「睇過新聞大人錫BB個嘴之後入院，都係小心D好」。
睇番爸爸Jason個社交網又真係成日見佢錫Abigail，不過就係錫「面豬登」多嘅，唔知佢之後會唔會收斂下呢？
（ig / 綜合報道）
