【戒呢兩樣嘢⋯】阿嬌:第一日已經瘦咗五至六磅

    鍾欣潼(阿嬌)今日喺銅鑼灣出席聖誕宣傳活動同fans玩遊戲,fans祝福佢下月正式出嫁,阿嬌幸福地唱出《下一站天后》。

    阿嬌話仲未準備聖誕禮物俾老公,而嚿年棵聖誕樹仲喺台灣,今年係佢哋兩人一齊度過嘅第二個聖誕節,阿嬌希望可以同老公一齊重新佈置呢棵聖誕樹。至於結婚後係咪即往台灣生活?阿嬌話:「唔知去向,都未知道。」依家佢正忙於整理賓客名單,暫時四十圍以下 ,男方台灣親友都會嚟香港,仲話越請越多人,小學中學同學都被邀請。

    今日見阿嬌明顯瘦咗,佢話:「開始減肥,戒甜、澱粉質、做運動,第一日已經瘦咗五至六磅,想定下一個目標同大家分享減肥,希望結婚前可以減磅,我婚紗都未試,條腰個size好細,覺得肥著乜都唔好睇,所以hold咗件婚紗減肥後先試,勵志啲,目標再希望減多十磅。」

    阿嬌指老公都一齊減肥:「佢好衰,佢有健身習慣,平時係我陪佢去,有次我哋臨出門口做運動佢就話好攰,係打擊緊我自信心,我問佢係咪想到時我肥你瘦?因為平時我好好多藉口,依家要逼自己減肥,老公逼唔到我。」

    (apple daily)

    SHARE