【同羅天宇分手之後】湯洛雯被爆撻著…

31歲「靚湯」湯洛雯與拍拖4年幾嘅羅天宇在今年3月宣佈分手。

廣告

廣告

之後都有傳過佢哋復合,不過靚湯一直話自己係單身。

月初靚湯出席黎國輝(阿感)婚禮時即刻搶花球,好似好恨嫁咁。

有媒體爆料上周五凌晨1點半左右,湯洛雯同龔嘉欣、莊思敏、莊思明等一齊喺銅鑼灣耀華街一間上樓酒吧夜蒲。穿上超短裙晒長腿嘅靚湯勁吸睛,全晚與一男子形影不離。
林小姐話:「湯洛雯有同朋友玩掟乒乓波嘅酒game,玩到咁上下,佢就坐咗上吧枱,同個男人好好傾,個男嘅仲摸佢大髀。」林小姐話佢哋之後企咗喺吧枱邊傾偈,之後男嘅越貼越近,背脊貼住靚湯,下半身貼到實,難得靚湯完全唔抗拒,傾咗幾句,男嘅就借力起身。

同場嘅龔嘉欣亦好受男士歡迎,有位男士突然出手搭住嘉欣膊頭,搞到佢個樣有啲驚,即時聳聳肩將雙手放喺心口,隔一陣終於「耍得甩」,就望住企對面枱嘅湯洛雯露出一副好慘情嘅樣。

而莊思敏都有同朋友玩飲酒game,思明較乖,全晚只係坐定定睇人玩,臨走前仲同靚湯goodbye kiss。約凌晨二時,嘉欣拉住靚湯準備離開,與同行友人前後腳一齊坐電梯走。

湯洛雯日前接受傳媒訪問時否認有新男友,被指與一男子好close,佢話﹕「No la.有朋友生日,一班朋友去慶祝,龔嘉欣、莊思明、思敏都喺度,全部都係朋友,之後去咗思敏舖頭坐咗一陣咋嘛。Still single,冇男朋友。」咁有冇追求者?靚湯都好坦白﹕「都有認識緊嘅新朋友,不過真係好初步啦。」

從片段所見,與湯洛雯纏綿一晚嘅男士,原來係姚子羚嘅有米前度男友鄭子邦(的士邦)!在IG發現,當晚其實係皮草太子爺王大業(Andy)嘅生日,一班朋友食飯開party,丁子高、周汶錡、陳靜(DaDa)、周啟邦兒子周國豐等都有出席,之後年輕嘅一班朋友再有下場,齊齊落酒吧狂歡。

的士邦坐擁逾億身家,擁有過百部的士,之前與無綫當家花旦姚子羚拍拖3年幾,正當大家等候姚子羚宣佈婚訊,最後卻是「分訊」!子羚喺今年3月7日,在ig證實分手消息,因為唔想外界太多揣測和假設,佢決定一次過講:「謝謝大家的關心~這是我們共同的決定,這些年我們共同經歷的,也就只有我們最明白,也感恩有他在我身邊~我們仍然很好~仍會彼此關心、支持、愛護對方。一段關係的完結並不代表就是結束~愛其實可以有更多不同的方式~我相信無論我們是什麼關係,仍會守護、祝福對方,也希望大家給予空間讓我們去處理我們的事~」。

有指子羚早已搬入男友位於赤柱嘅豪宅同居,一心等住做鄭太,點知男友對結婚嘅興趣唔大,因為鄭子邦本身離過婚,加上雙親已離世,再無婚事壓力,最終與子羚不婚即分,十分可惜。

另一邊廂,湯洛雯與羅天宇因為合作拍《愛·回家》時撻着,拍拖4年幾一直恩愛,讓人感覺似兩小無猜。但今年3月9日,即姚子羚同的士邦宣佈分手後兩日,湯洛雯同羅天宇又被雜誌爆分手。羅天宇承認同靚湯在生活上出現問題,分開大概4個月。而靚湯就表示大家係和平分手,當中唔涉及第三者。

(綜合報道/Apple daily)