【係咁叫唔好】JJ賈曉晨:好對囡囡唔住

賈曉晨(JJ)同樊少皇於2015年拉埋天窗,婚後兩年更成功造人,去年誕下囡囡升呢做爸爸媽媽!

喺囡囡半歲時公開「小飯兜」正面,唔少網民大讚B囡似足媽咪咁靚女!

囡囡眼仔睩睩超可愛!

日前佢哋兩公婆就喺圓方為小飯兜舉行一歲生日會!

出席嘅除咗JJ媽咪等一眾親友外,仲有呂慧儀同囝囝蟹籽、劉松仁、姚瑩瑩兩母子等等。

JJ話搞生日P係因為之前已經冇為個女搞滿月同百日宴,覺得好對囡囡唔住。而自己結婚亦都冇擺酒,所以好想做啲嘢,等將來有個紀念,最後決定為囡囡搞生日會。

仲令自己諗番起當時生BB嘅情景:「當晚五點幾穿羊水,想打畀老公,但佢瞓覺校靜音,搵咗好耐都搵唔到佢,好彩最終趕得切返香港幫BB剪臍帶,好似拍戲咁,但成件事好圓滿。」

問到會唔會想追多個?JJ話:「暫時唔好,o依家要多時間照顧個女,冇時間照顧其他嘢,用咗我好多精力。」會唔會想追個仔?JJ坦言:「就算追,女係咪會好啲?一個仔一個女,大個傾唔到心事,兩個女似閨密嘛!」樊少皇就話仔女都冇所謂:「阿女幾百厭,大啲培養佢學我嘅興趣,教佢打功夫玩電單車,佢細細個喺床瞓已經會伸隻腳出欄,兩個月大已經想企喺身,好百厭。」

不過樊少皇一邊講,JJ就一邊喺旁邊係咁話唔好啦,睇嚟唔係咁想個女跟隨爸爸嘅興趣,更當住老公面話:「不如你哋勸下佢,唔好教個女打功夫,女仔嚟㗎嘛,唔想將來太過粗魯,我驚第時返學打同學日日見家長,太活潑喇咁樣。」

樊少皇話o依家去外地拍戲都會心掛掛個女,不過同樣都會掛住老婆,JJ即反駁:「我唔覺得囉!係咪呀?阿女已經超越咗我。」樊少皇即話:「我呷醋多啲,你成日掛住個女。」兩公婆不停借住個女打情罵俏。

另外,早排樊少皇被指欠債,但JJ就解釋係自己借錢畀朋友,被反咬一口,問到件事點處理?JJ話已經交咗畀律師處理,有信心打贏官司,經此之後唔會再借錢畀人。

(綜合報道/Apple daily)