森美尋晚PO咗兩張相，相入面佢、小儀同基仔齊齊做出托頭瘦面POSE。
原來今日係小儀生日，所以尋晚森美就孖埋古巨基(基仔)同幾個朋友為佢慶祝！第二張相好有心咁P返個生日蛋糕上去～
不過張相就畀網民笑問佢哋係咪齊齊牙痛呀？
而基仔上載嘅相入面就有張大合照，見到古太都有出席，佢仲搞笑地幫老婆托腮，「手動」幫佢P成V面！網民見到都話佢哋喺小儀生日都放到咁閃，小心閃親壽星女呀～
而因為基仔出名手汗勁，仲有網民搞笑話影完呢張相，古太塊面應該濕晒啦！
其實之前基仔已經試過主持無綫節目《流行經典50年》嗰陣，因為太多手汗搞到支咪壞咗添呀！
唔知係咪因為佢有「前科」嘅緣故，呢日佢為無綫錄影節目《勁歌金曲》，工作人員就好貼心咁為佢準備咗私家咪套，令佢都忍唔住喺社交網PO相，留言話：「TVB都怕了我…的手汗！！哈，專用吸水咪套！#我手汗真係弄壞過很多咪 #咪之殺手。」
仲加埋呢期最流行嘅汪阿Tag！
咁都未算誇張，事關基仔之後再開Post，原來佢一邊PO相上社交網，隻手就一邊滴汗，仲滴到地板都有汗水，認真犀利！
(綜合報道)
