陳豪同陳茵媺（Aimee）兩夫妻噚晚現身沙田為聖誕亮燈儀式擔任主禮嘉賓，早前因拍劇到台灣三星期嘅陳豪被太太Aimee網上尋人（相關新聞：https://goo.gl/mh515U），陳豪終於返港啦！
噚晚夫婦兩人小別勝新婚，喺活動上恩愛非常。陳豪更不停大讚太太賣口乖，當Aimee分享最難忘嘅聖誕禮物係收到老公親手整，貼滿一家五口生活照嘅聖誕卡時，陳豪就話：「年年節日佢都會親自下廚，越煮越好食，尤其Turkey（火雞）真係好juicy（多汁），所以我收到咁juicy嘅Turkey，我就要送番個Big heart（滿滿的愛）畀佢。」o氹得太太笑到四萬咁口！認真甜到漏～
對於老公甜言蜜語，Aimee唔覺得係口花花，佢話：「 我覺得好sweet sweet（甜蜜），好正常。」陳豪指兩人動又得、靜又得，一家都鍾意笑，佢又不厭其煩再大讚太太廚藝，Aimee話：「我每年都會買多兩隻同一個牌子，同一個磅數嘅火雞，之前試整兩次，等去到聖誕節嘅時候就可以做到最好食，因為唔可以失敗。」
陳豪指家中三位小朋友開始揀飲擇食，結果令只會節日才入廚嘅Aimee出馬，每日悉心為仔女準備三餐，Aimee話：「我學整廣東菜同日本菜，等佢哋食得開心啲。」真係超有心思！陳豪亦能受恵不用怕肥而忍口，因為太太用最健康方式去煮廣東菜同日本菜。
平日不用工作時，夫婦都享受親子時間，原來今次佢哋外出工作時，仔女們都想跟埋一齊，問到佢哋點解決？Aimee話：「我同佢哋講話聽日有surprise（驚喜），不過我唔主張畀物質佢哋，可能帶佢哋去沙灘，去做一啲平日做唔到嘅嘢，以學習體驗為主。」
佢哋又指兩歲大嘅囡囡開始貪靚，會偷偷用媽咪嘅護膚品同化妝品，Aimee話：「每當我著得靚啲嘅時候，佢就會望實我，仲會認得邊件衫同邊件衫係同一個牌子，連我都嚇一嚇。」估唔到小公主咁犀利！
(綜合報道/Apple daily)
