【卓林秘密返港見媽媽】吳綺莉承認:佢真係瘦咗好多

    吳綺莉嘅19歲女兒卓林舊年承認戀上加拿大籍女友Andi,之後母女關係惡化,卓林更離家出走。

    今年4月,卓林同Andi飛到加拿大過住顛沛流離嘅生活,聲稱無家可歸嘅卓林,更喺YouTube拍片尋父親成龍,之後,佢又俾人影到拖住買餸車到垃圾站,疑似「拾荒」,其後有消息指,卓林同Andi喺溫哥華居住其間曾經欠租兩個月,搞到俾屋主趕走。

    早前曾發訊息俾香港十幾間公關公司,表示希望可以返港後獲邀出席活動嘅卓林同Andi,原來已經返咗香港喇。昨日讀者Bobby表示下午兩點半左右,喺銅鑼灣中央圖書館附近見到卓林同Andi,着住白色情侶裝嘅卓林同Andi,好恩愛咁手拖住手行,不過Andi就喺衫外加咗件佢至愛嘅粉紅色外套。

    讀者Bobby話:「佢哋講嘢好大聲,笑得又大聲,所以就留意到。佢哋一路行一路食煙,經過嘅時候仲聞到好大陣煙味。」

    據知卓林同Andi係昨天早上返港,吳綺莉有安排同事接機。吳綺莉接受電話訪問時承認卓林已返港:「係,我內地同事去接佢,仲返咗屋企同我坐咗一陣。我今日又要出去做嘢,所以冇講乜嘢。(成半年冇見個女有咩感覺?)佢真係瘦咗好多。(係咪真係結咗婚?)我冇問!」係咪安心咗?佢話:「可以咁講,我感覺到佢有長大,但唔可以用我嘅年紀去比較,慢慢嚟啦。」

    問到卓林係咪返屋企住?佢話:「唔係,暫時唔返嚟住。(幫佢安排地方?)身為媽咪就覺得佢哋應該學習獨立,大家都18、9歲,每個人都有迷惘嘅時候,我諗所有媽咪一樣……但家門永遠為你打開。」吳綺莉說話含糊,但聽得出仲未接受到Andi。有指卓林同Andi喺溫哥華居住時欠租,問佢會唔會代交?吳綺莉話:「做媽媽,當然都有底線,佢朋友(Andi)都30幾歲,每個人都要承擔做事後果。」

    (綜合報道)

    SHARE