【成功克服臍帶纏頸等問題】吳日言經歷10小時陣痛誕6.6磅B女

今日35歲生日嘅吳日言報喜!Yan宣布順利誕下6.6磅B女Bea!



懷孕期間患上妊娠糖尿,加上產前預測BB有機會出現臍帶纏頸問題,不過吳日言希望感受完整做媽咪嘅感覺包括痛楚:「可能好多媽咪都會選擇開刀一了百了,但係呢一種痛只有媽咪先會知,我想好好記住。」

加上醫生畀咗好多鼓勵,吳日言最終決定嘗試順產,大前提係BB安全為先。

經歷長時間陣痛,期間「陣痛指數」更高達127,約十小時左右,吳日言透露BB突然情況不穩,心跳更跌落80並不樂觀,五分鐘內未能順產便要緊急開刀。

當時佢乜都冇諗,淨係知道要出力出力再出力,最後成功克服臍帶纏頸同埋BB位置等問題,成功誕下愛女Bea。


吳日言指當時好感動,但係已經筋疲力竭眼淚都流唔出,之後更因血壓指數太低要喺產房休息兩個鐘,笑言好似發咗一場惡夢,夢醒之後就收到一份大禮物,雖然好辛苦但係都值得,稱Bea就係佢今年最大嘅生日禮物!

問到Bea幾時出世?吳日言表示想幫囡囡保留一啲私隱,只可以講自己、老公同囡囡都係十一月生日,囡囡趕得切出世同自己慶祝生日。

(on.cc)