今日係吳日言（Yan）35歲生日，佢同時喺今日宣佈喜訊，就係囡囡Bea出咗世喇！恭喜晒！Yan今日接受訪問話BB重6.6磅，一直希望順產嘅佢，亦都願望成真。陣痛指數更達到127，難怪佢話好似發左一場惡夢，但夢醒得到一份好大嘅禮物，覺得好值得。
問Yan係咪同囡囡同一日生日？佢就笑住話：「唔係呀！邊日出世就賣下關子，但佢都係人馬座BB，老公都係11月生日，我哋將來呢個月會不停切蛋糕。」
Yan陀B時已發現有妊娠糖尿，故醫生建議佢喺38至39周生比較好，佢話：「可能有好多媽媽會選擇開刀，一了百了，但係如果我唔試催生而直接開刀，Bea就連試順產出世嘅機會都冇。即使我知道Bea有臍帶纏頸問題，催生都未必成功，最尾我可能要食一個大全餐，但係我覺得去試總有機會，唔試就一定冇。」
Yan話佢一直好想感受生孩子嘅痛楚，「我認為人生有好多唔同嘅痛楚，但係呢一種陣痛只有媽媽先知，我要好好記得佢。醫生亦比好多信心我，大前提係BB安全為先，所以如果生產過程有任何問題出現，一切都會聽醫生嘅指示。」
講到入產房到BB出世，經歷咗12個鐘，Yan話好似發左一場惡夢。佢話：「我冇選擇無痛分娩，只靠聞笑氣，老公一直喺旁邊支持我，不停同我報告陣痛數字，陣痛指數達到127，感覺好似死去活來，我一世都唔會忘記呢個數字。」
Yan又透露，陣痛到10個鐘都發生驚險事，佢話：「BB心跳突然跌落80，情況並唔樂觀，再過多幾分鐘都未生，就應該要開刀。我當時冇諗其他嘢，只係諗住用力，就喺千鈞一髮，隱約聽到一班醫護人員同老公為我吶喊，教我忍氣用力倒數10聲。原來BB位置同臍帶問題影響出生，所以真係要多謝醫生嘅經驗同埋佢嘅果斷，幫我順利誕下BB，聽到BB嘅喊聲非常感動，不過我冇喊，因為已經筋疲力盡。」
原來Yan生完血壓指數好低，要先喺產房休息兩個鐘。佢話：「休息咗兩日，感覺仍然好似用咗10幾個鐘，跑左三次馬拉松，全新嘅肌肉都好痛好攰。不過都值得，因為我們母女平安。Bea 係我今年最大嘅生日禮物。」
(綜合報道/Apple daily)
