【張母在養和探栢芝】傳張柏芝已順利誕下第三胎

    現年38歲嘅張栢芝,06年同謝霆鋒結婚,可惜最終兩人於11年宣佈離婚。

    14年霆鋒更與舊愛王菲世紀復合。

    相反一直肩負照顧兩個兒子謝振軒(Lucas)同謝振南(Quintus)重任嘅栢芝,離婚後只斷續有緋聞傳出,至今栢芝未開腔承認任何一段新關係。
    兩個仔經常被稱讚家教好好!

    最近《蘋果日報》收到消息,有傳兩子之母張栢芝已於本月25日,在養和醫院順利誕下第三胎。

    栢芝同謝霆鋒所生兩個兒子今年分別11歲同8歲。
    一向喜歡小朋友嘅栢芝,今年2月底曾在社交網上載一張擁着小女孩的相片,然後留言:「2018年之前,必定要生出BB來,this is my goal!」

    之前兩胎都在養和生嘅栢芝,今次再生B保密工夫做到足,佢亦「神隱」咗一段日子,不但將社交網、微博嘅個人帳戶都將全部貼文刪掉,相隔十年再拍大陸劇《如果,愛》,今年五月播出,佢都冇參與任何宣傳活動。

    除咗家人同佢最信任嘅經理人Emily,由見肚起已同外間完全隔絕。

    今日約於下午有傳媒見到栢芝媽咪喺養和離開,張母當時拎住張紙,記者上前影相,問到佢係咪探栢芝?栢芝媽咪即以手上嘅紙掩面,再慌張解釋:「唔係唔係,只係睇病啫。」

    期間佢急步前行,與平日大方讓記者影相態度有異。當記者再追問最近有冇見過栢芝?栢芝媽咪突然唔出聲,之後只答「唔該晒,唔該晒」再匆匆急步行去跑馬地方向。

    《蘋果》致電栢芝經理人Emily,恭喜栢芝生咗BB,不過佢就回覆話:「冇嘢講喎,sorry,拜拜!」
    (綜合報道 / apple daily)
    SHARE