藝人余德丞（Dickson）日前孖住緋聞女友蔡思貝一齊主持旅遊節目《緬甸奇幻旅程》，有傳二人因拍節目撻着。
之前Dickson出席活動時被問到有傳蔡思貝因形象差的問題，令到劇集《大帥哥》淪為倉底貨，Dickson就話：「我唔知呢件事，但聽啲PA同導演講套劇幾好睇。」問到可覺蔡思貝形象差？佢即力撐緋聞女友：「唔係啊嘛？佢形象好好喎，因為我鍾意做運動同短頭髮嘅女仔，可能我對佢有Bias（偏心）啦。」仲講到明係偏心思貝！
Dickson仲毫無避忌喺社交網上載二人親密合照，佢更合上眼，好冧咁將頭挨落對方膊頭，畫面十分甜蜜。
佢仲留言表示二人性格大不同，但卻如此合拍：「佢鐘意睇書 我鐘意睇波 佢鐘意刺激 我鐘意舒適 佢唔鐘（鍾）意俾（畀）人控制 我鐘（鍾）意控制人 可能就係因為咁 當我亂咁噏當秘笈 佢會講埋我份台詞 當我認真同人溝通緊 佢會係（喺）汁（側）邊輕鬆慢慢等」
Dickson嘅留言令傳言更加撲朔迷離，連好多網民留言話以為佢公開戀情，不過佢其實係為二人節目拉票，仲話思貝係最佳拍檔！
(綜合報道/on.cc)
