袁偉豪同張寶兒呢pair甜甜蜜蜜，感情穩定，不時傳出婚訊，不過每次佢哋都否認。
早前仲一齊去咗日本為寶兒慶生！
無論開心定唔開心，另一個都會陪住對方！
李佳芯同袁偉豪昨日喺鑽石山出席活動。講到佢哋兩個分別角逐視帝、視后，早前已經攞咗星、馬視帝嘅袁偉豪就話平常心，仲表示希望將自己嗰票投畀馬德鐘：「我有兩個已經好滿足，唔可以去到咁盡。」提到女友張寶兒，講過如果袁偉豪成三料視帝，佢將會有驚喜送畀男友，袁偉豪即刻話：「吓！好驚呀！唔好嚇親我。」
提到前晚播出嘅《美女廚房》，有指蝦頭（楊思敏）從後攬住袁偉豪，咁啱又畀女友張寶兒見到，點知袁偉豪當刻就趕女友走，佢今日提番呢件事就笑住話：「男人做緊嘢，望住晒，我點開工呢！」
講到視后，袁偉豪指視后競爭雖然大，但會睇好李佳芯、陳煒同黃智雯。
候選人之一嘅李佳芯就話：「好多嘢太估唔到，香港呢個仲冇得估，所以唔估就最好。」
對於由張衛健主演嘅《大帥哥》聽晚首播，但未播已獲提名，李佳芯就認為冇問題：「咁咪仲熱鬧，幾好，大家都鍾意百花齊放。」問佢最近做乜放慢手腳唔拉票？李佳芯笑住話：「o依家拉，其實我內心好緊張，（叫男友陳炳銓投票？）我會叫身邊嘅人同屋企人投票，向外就要靠大家。」
(綜合報道/Apple daily)
