就快又嚟到無綫一年一度爭視后視帝嘅大日子，上年憑《踩過界》嘅盲人律師成為視帝嘅王浩信。
今年以《兄弟》一劇入圍，唔知佢有無信心呢？
事業得意嘅王浩信，感情方面就屢屢傳出婚變同緋聞，而今日更有報道指老婆陳自瑤已經對雙方嘅婚姻關係死心，正辦理離婚。
王浩信同陳自瑤一個歌手出身，一個拍偶像劇入行，兩人喺千年一遇嘅11年11月11日11時結婚，婚後育有一女靖喬，今年都已經六歲。
誕下愛情結晶後，男方事業更步步高升，絕對可以話係幸福美滿羨煞旁人。
不過隨住王浩信人氣急升，緋聞不絕，有報道指其實早於婚前兩人亦曾因第三者介入而出現感情問題，不過最終王浩信都回頭抱得美人歸。
今日有報道話王浩信自從同江嘉敏傳出緋聞後，已經收歛咗不少，除咗跟伍允龍返教會之外，更向陳自瑤提出接受婚姻輔導，可惜女方深覺感情轉淡已心死無力挽留，現正辦理離婚。
(綜合報道 / apple daily)
