【問到BB性別就話⋯】香香宣布佗B後首現身

前日喺IG公佈懷孕嘅岑麗香(相關新聞:https://goo.gl/9Tv9fD),昨晚身穿金色閃閃連身裙盛裝出席「浪琴表香港國際賽事」晚宴,雖然香香明顯肚仔凸凸,但就仍然無懼,着住高踭鞋出現,但行動仍然靈活,完全冇受任何影響。

正所謂人逢喜事,香香喺訪問時表現得非常開心同興奮,提到終於公佈有喜,佢就笑住話:「係呀終於可以公佈,我自己都唔係幾好意思,之前出席活動嗰陣都有好多人估吓估吓,我呢排自己又成日飛嚟飛去,自己好想同屋企人面對面去講呢個消息,我覺得咁先係一個專重,好過喺報紙上面見到。」

懷孕消息一出之後,香香話收到唔少人嘅祝福,覺得好開心,問到老公強強係咪仲開心?香香就話:「其實我哋都一樣興奮,只不過我有多啲嘅感覺。」至於BB依家幾大,佢就話:「都有一段時間,已經5個月大。」大家話佢懷孕消息收得好密,佢就話:「係呀,其實有段時間自己都唔舒服,想瞓多啲、休息多啲,唔知係咪成日飛嚟飛去搞到自己以為係jet lag,我哋都好遲先知(有BB)。」

香香指依家都好努力散步:「依家做簡單瑜伽,同埋做臉面按摩,驚自己臉腫。」問到佢幾時停工?佢話:「其實都會繼續工作,預產期係下年4月,係一個小豬BB。」問到BB性別,香香就話自己都想保持驚喜,但就唔知自己可以忍到幾時:「其實每次去睇醫生嗰陣,都會叫佢遮住個(性別)『欄目』,都好多謝醫生嘅配合。」問到強強係咪都唔想知,佢就冧住話:「其實好多嘢佢都畀我決定,我覺得佢忍耐能力叻過我。」提到生出嚟後可以同李亞男個B一齊做friend,香香就話:「係呀,真係呀,好多人都恭喜我,我都覺得好感動,同埋好多成為咗媽咪嘅朋友都同我講『Welcome to the mama group』。」至於會喺香港定加拿大生B,香香就話未知:「因為兩邊都有好處,我都同老公消化緊,要努力學好多嘢,之後先決定。」

香香早前透露今年會飛返加拿大過聖誕,佢指若然醫生話ok,自己就會飛:「BB就係我今年最好嘅聖誕禮物。」跟住香香又望住自己個肚講笑話:「我都估佢唔到呀!」雖然未知BB性別,但香香就話已經開始買定黃、白色嘅BB衫:「都好enjoy呢段時間,因為責任仲未太大,將來都希望喺家庭、工作兩邊取得平衡,雖然知道好難,但會盡量做。」至於會唔會叫好友苟芸慧都快啲生,香香就話:「呢啲都唔催得,我結婚嗰時都諗『兩年後有BB就好喇』,依家都真係呀,所以好感恩,我覺得啱啱新婚嘅朋友,其實有佢哋嘅honeymoon都好正!」

(綜合報道)