【同許廷鏗關係…】胡鴻鈞:唔係男就女啦

完成首個音樂會的歌手胡鴻鈞(Hubert),於騷後受訪講到造型上Keep住做「花花公子」,Hubert自豪表示今晚除了是個唱之外,亦是一個Fashion Show,一共出動4套私伙衫。

「梗係去盡佢啦,落足心機!」又指自己破天荒跳舞,即被記者笑話得幾吓,問到之前不是說要比吳業坤、許廷鏗跳得更好?他信心爆棚話已完勝:「贏咗啦!大家要明白除咗肢體動作,表情都好緊要,我個表情已經贏咗!(即係覺得佢哋有太多花巧動作? )咁又唔同,佢嘅Style同我嘅Style唔同,大家各有千秋,但我覺得可以再做好啲,希望下次有多啲時間準備。」

問到被Dancer摸胸可有反應?Hubert抵死反問:「佢哋有冇反應就真嘛?問我有冇反應?(你有冇心跳加速?)我覺得佢哋有心跳加速,兩邊加埋42吋胸肌喎!咁係個效果啫,成首歌感覺Sexy啲。(Sexy唔着少啲衫?)唔想畀啲肉搶Focus,專注番舞蹈。」續指昨晚冇覺好瞓,雖然一早上床但整晚都輾轉反側,成日望住時間,一完騷最開心是見到好多圈外、圈內朋友來支持。

講到於台上唱情歌Medley前表示身邊有一個人一直影響自己,笑問對象是否今晚前來捧場的好友許廷鏗(Alfred)?

他即刻否認:「如果係送畀佢會指明,就好似送《忍》畀Mag(林欣彤)咁,都好大方講,如果真係送畀Alfred就一定會話送畀佢。(但入面有首歌《旅行的意義》,你哋唔係一齊去旅行?)係去咗旅行,但呢段Medley真係唔好意思,唔係送畀佢。」咁送畀邊個?Hubert仍然大賣關子,繼續封口話:「對我生命好緊要嘅人,但佢唔係喺呢行,就冇必要講。(男仔定女仔?)唔係男就女啦,但係女仔嚟嘅。(係咪要自爆話有圈外女朋友?)唔關事!係影響我好多嘅女仔,Keep住亦師亦友。(今晚有嚟?)應該有啩,有請佢嘅。」

老闆何哲圖都有到場力撐,可有望入紙申請紅館檔期?Hubert笑話冇咁快,但都希望短時間內再有音樂會,目前主要儲更多歌,心願是想有首跳舞快歌。

許廷鏗喺社交網晒出同Hubert嘅合照,仲留言大讚佢叻仔:「人生第一個show!呢隻仔大個仔喇!今晚叻仔!!」

 

 

 

 

 

(ig / on.cc)