【同張馨月蜜遊日本】林峯爆有喜事:好開心

    藝人林峯在尖沙咀出席人氣搜尋大獎嘅頒獎禮,佢話:「今年拍咗4部作品,希望出年畀到驚喜大家,因為會睇到同平時唔同嘅林峯。」

    佢獲頒「熱搜藝人」獎項,佢就話好開心,因為今年好少時間喺香港,中間又有幾個月唔喺香港拍攝。

    對於被揭與女友張馨月蜜遊日本,講到網民都好關心佢嘅戀情,佢就笑得好冧咁話:「多謝大家關心,香港嘅傳媒朋友好勁,連我去邊旅行都知。因為之前拍咗四部影視作品,自己都要抖抖氣,所以就同身邊人、同屋企人一齊去旅行放輕鬆吓,因為不停拍戲精神壓力都幾大,有三個角色幾大挑戰,大家未見過我咁演戲,係大家冇見過嘅林峯。」

    問到係咪見家長,佢就話:「私人嘢我再重複,記者朋友影到我會承認嘅,但係唔會主動分享我工作以外嘅嘢,多謝大家關心,總之我依家生活非常之好,好開心。」

    問到咁忙係咪唔得閒搞喜事,林峯即時報喜:「有喜事嘅,我細佬開咗新舖。」咁係咪未到結婚階段?佢就話:「未,冇期,未有期,度一度先,今年係我重新出發,工作量好大,出年更甚。(到適婚年齡?)男人都係工作為先,工作對我好緊要,係我嘅夢想,想趁仲有氣有力去做。」

    (綜合報道)

    SHARE