藝人陳茵媺（Aimee）同陳豪結婚5年，婚後育有兩子一女，一家五口生活幸福美滿！
話咁快原來大仔梓燁（Aiden）已經5歲、細女凱婷（Camilla）亦已經2歲大。
日前5點幾，一身街坊打扮嘅Aimee，帶住三歲嘅二仔浩鋒（Nathan）喺香港仔大街行街。
原先被抱住嘅Nathan，因為扭計要落地，最後兩母子手拖手行。
Aimee似喺度搵緊地方，邊行邊搵，路過有趣嘅聖誕佈置時，Aimee又會同囝囝影相留念。
最後佢哋去到香港仔中心，入咗一間連鎖玩具店。
入到玩具店後，Aimee似有意大手掃貨，先拎起兩個店內提供嘅購物袋，跟住就好細心咁逐樣玩具攞起嚟慢慢揀，仲不時詢問身邊嘅店員，每一件玩具嘅出處同相關卡通片。
見Aimee將「變形金剛」玩具同時興嘅「爆旋陀螺」比較，見佢個樣好惆悵，似乎難以取捨。而Nathan就好乖自己去挑選玩具。
經過一個鐘嘅精挑細選後，Aimee最後買咗一大袋玩具同花紙離開。離開嗰陣，Aimee接受訪問話臨近聖誕，所以買定啲玩具畀自己同朋友嘅細路仔，大家開心喎。
(Apple daily)
