王祖藍日前上載女兒超聲波的圖片，面型大鼻子似足祖藍。祖藍笑言：「鼻大唇厚好易湊，佢一日未出世，我都祈禱唔好似爹哋。」
王祖藍、毛舜筠及王菀之，噚晚喺大埔為電影《你咪理，我愛你！》進行拍攝。
王祖藍同李亞男嘅愛女隨時出世，祖藍表示向毛姐請求訂製曲奇餅，作為百日宴禮物，可惜未能如願，祖藍笑言：「原本諗住同毛姐搲曲奇，訂一百幾十盒，可惜毛姐話做唔切，接唔到我單。希望呢套戲嘅票房都好似毛姐嘅曲奇咁賣晒。」
毛舜筠表示，知道大家會喜歡佢出品嘅曲奇，但冇想過咁受歡迎，每日三點已經賣晒，毛姐話：「諗住賣晒就閂門，同事話唔可以閂，因為要接單翌日賣。自己又開心又驚，驚唔夠賣，想每個人都食到。」
另外，祖藍話等待女兒出世，覺得時間好漫長，佢話：「老婆預產期我唔喺香港，但已經同劇組講好，如果到時要生得就要返香港陪老婆，親手剪臍帶。」
(Apple daily)
