【同賴弘國唔鬧交係因為…】網民替阿嬌不值:為什麼要這麼卑微啊

阿嬌嚟緊18號就會同有「醫界王陽明」之稱嘅賴弘國正式喺香港簽紙註冊結婚,20號就擺婚宴。

阿嬌下周出嫁,近日已開始派帖,經理人霍汶希(Mani)今日喺Instagram曬出阿嬌喜帖相片,阿嬌情有獨鍾用充電器當喜帖(相關新聞:https://goo.gl/4fFi3S),一對新人着住中式禮服,阿嬌個Q版裙掛新娘look好得意。

阿嬌同未婚夫賴弘國甜到漏,兩人電力充足!

不過呢位準賴太,最近上由大S徐熙媛主持嘅大陸節目《Beauty小姐》嗰陣,就彈未來老公冇taste之餘,仲爆佢不時會發小脾氣添。

 

阿嬌今次上大S嘅節目,除咗講吓保養心得外,嚟緊將會成為賴太嘅佢,被大S問到結婚嘅禮服喺自己定係未來老公揀、又抑或係兩人一齊揀嘅時候,阿嬌就表示有一齊去揀,但佢就話賴弘國揀嘅都好醜樣,搞到大家都忍唔住笑。

之後阿大S又問到佢同賴弘國之間,若有意見分歧嘅時候會點處理,阿嬌就話自己係一個唔鍾意鬧交嘅人,不過就爆老公並唔係:「有時候他的小情緒上來了,我會避免了那場吵架,就會用另外一個方式去安撫他。」大S就問佢係咪用嗲功,抑或其他方法時,阿嬌就話:「就是哄他,我以前是不會的。」然後佢又補充:「我有時候買東西,會看我旁邊那個人的眼神,因為他有說過『你買包不看價錢?』,我說『沒有啊』」

大S即時笑住問阿嬌係咪真係唔睇價錢,跟住阿嬌就話:「不是,因為我喜歡的牌子是比較貴,但我是用自己的錢,我覺得我那麼辛苦努力賺錢,但……現在會顧慮到他的感受,我就不敢買。」

跟住大S就話見到阿嬌咁nice咁溫柔,都應該鬧唔落交,點知阿嬌就爆出一句:「主要是我國語不太好!」,咦!咁即係講廣東話的話,可能會發生大戰?

雖然阿嬌咁溫柔體貼,不過好多網民睇完就替阿嬌不值,紛紛留言話「花自己的錢買包有問題嗎」、「為什麼要這麼卑微啊」。

(綜合報道/Apple daily)