【三年抱兩】肚凸凸出巡中環

    囝囝舊年出世,眨吓眼都已經1歲半大,佢喺10月尾宣佈再佗第二胎,三年抱兩,恭喜恭喜!

    日前佢身穿西裝褸襯爛牛,腳踏平底鞋,喺中環ifc出現,見佢面圓圓同身形都肥咗少少。

    楊愛瑾(Miki)前年嫁咗畀富二代郭永淳,升呢做永安新抱!

    時不時都會PO下囝囝Luken嘅得意相!

    日前捕獲到佢一個人首先行咗入去一間專賣有機護膚品嘅商舖,估計佢之前已經訂好心水貨物,所以佢入店後,店員已好快將一袋戰利品交畀Miki,Miki同店員傾咗一輪先捨得走。

    之後,Miki行咗入商場嘅高級超市,見佢全程慢行,專攻健康類食物,如蔬菜、水果、三文魚等食材,原本打算去排隊畀錢時,佢再攞多兩袋麵包,果然要照顧家中大小同肚裏BB,所以要食得健康。

    最後,Miki就拎住一大袋戰利品離開,佢行去扶手電梯時,記者上前問佢腹中BB係男定女,佢就有禮貌講:「唔好意思。」避做訪問,行到去商場門口,原來已有朋友做柴可夫,揸住車嚟準備接送。

    Miki雖然大肚,不過嚟緊會外出旅遊,佢之前就在喺IG貼文,講到要帶囝囝坐飛機,加上自己佗住一個,所以有啲擔心。

    佢留言表示:「真的好忙好忙……月中要帶著Luken坐長途飛機,諗到都緊張。雖然佢已經一歲半,但我肚裏還有位寶寶,始終在照顧上也不太方便,希望Luken在飛機上能睡上8小時,盡量不打擾到其他旅客,時差方面也能調節得好,還有行李清單也要準備好。」

    (Apple daily)

    SHARE