【三對情侶超級Sweet】江若琳多次感動落淚

    今日江若琳(Elanne)同蕭潤邦(Oscar)結婚啦!

    一對新人凌晨6時已經起身化妝、整頭為婚禮做好準備。

    上午9時,Oscar孖住17位兄弟團,包括擔任伴郎的謝安琪(Kay)、張繼聰、電台DJ當奴、細So、Jerald、JW(王灝兒男友)富二代男友Tarzan Ip(葉韋彤)、Kenji Lee及Hachill輝等到酒店房接新娘(相關新聞:https://goo.gl/FgsTPB),新郎更依足傳統準備了8人大紅花轎迎娶Elanne。

    接受完Elanne姊妹團的「酷刑」對待後,包括任伴娘的小肥、JW、黎美言、張紋嘉、張惠雅及Erica Tang等的玩新郎遊戲挑戰後,他終於成功贏得老婆歸。而穿上中式結婚裙褂襯金頭飾的新娘子,人逢喜事特別明艷照人,一對新人一見面即又攬又錫,之後新人向父母跪地斟茶,Elanne聽到長輩祝福時,多次感動落淚,而江媽媽亦送上多款金器作嫁妝。新人還向兄弟、姊妹團大派大利是。

    3 Pair情侶勁煙韌

    接着手戴三對勁粗龍鳳鈪及金戒指的Elanne偕Oscar在大妗姐的陪同下移玉步到酒店的花園兜圈取行大運之意,更在維港的無敵海景前拍大合照,Oscar和Elanne全程十指緊扣,而另一Pair情侶亦很煙韌,見卓悅太子爺Tarzan Ip攬住女友JW,至於Kay和老公張繼聰就貼到實,Kay更嘟嘴賣萌。

    Oscar今早為迎娶江若琳可謂去到盡,在玩新郎遊戲中,他放下型男包袱,戴上金色長假髮、着裙變身、戴上「口腔固定器」,變身做「大口」美少女戰士,他接受訪問時說:「玩咗三個遊戲咋,佢哋全部都好錫住我,扮美少女戰士同戴住口箍已經最啃。(幾多開門利是?)總之佢哋happy啦。」

    而江若琳(Elanne)則說:「我覺得佢最靚係呢個造型,係一絕嘅,我啲姊妹諗得好好,全日都好感恩,由尋日上頭開始,已經覺得好感動,同埋因為全部兄弟姊妹、屋企人都嚟晒,斟茶畀爹哋、媽咪同公公(故鄉稱爺爺為公公)時,令我諗起好多回憶,尤其係因為屋企最老嘅長輩只得佢一個,突然間諗起我婆婆、嫲嫲,我公公又睇唔到,我就忍唔到,突然間好感觸。」

    (綜合報道/on.cc)

    SHARE