【網民勁送祝福】恭喜哂胡杏兒!

    聖誕節胡杏兒就唔喺香港,不過老公李乘德(Philip)就同囝囝父子裝上陣合照,仲話佢同Brendan都好掛住杏兒!一唔小心又放閃,閃親一班網民!

    但原來仲未完!杏兒同老公喺2015年拉埋天窗,婚後誕下囝囝Brendan,佢時不時都會喺IG曬下一家三口嘅溫馨日常,真係好Sweet!

    唔經唔覺,杏兒同老公已經結咗婚三年喇,連囝囝Brendan都已經1歲大,時間真係過得太快啦!連杏兒都忍唔住話:「我的寶貝兒子,感覺昨天才把你從醫院抱回家,一晃眼你已經一歲了,每天看著(着)你,希望你長大,又捨不得你長大。很感恩打從一出生你就被這麼多的愛包圍著(着),感謝所有疼愛你的人。希望你可以一直健康成長,乖乖的,要孝順奶奶及長輩,最重要的是,希望你可以一直做一個開心搞笑的寶寶,媽媽和爸爸很愛你!!」

    三年以嚟佢兩個都非常恩愛,今日係佢哋嘅皮婚紀念日當然都唔例外!

    佢哋夫妻齊齊喺凌晨12點之後將佢哋3年前嘅結婚宴會上嘅相上載到社交網站,兩個仲互Tag咗對方添!

    杏兒上載嘅係佢好幸福咁望住老公;

    而Phil上載嘅就係佢好深情咁望住老婆,兩張相嘅角度雖然唔同,但Sweet嘅程度就一樣喇!

    杏兒留言話:「Hubby, thank you for being my rock, my mentor in life, my problem solver, my entertainer, the father of my child and my lifetime partner. Happy leather anniversary! (親愛嘅老公,感謝你成為我嘅支柱、我嘅人生導師、我嘅麻煩解決者、我嘅大娛樂家、我BB嘅爸爸、我一生嘅伴侶。皮婚快樂)」

    而Phil就留言:「Haven’t stopped smiling like a fool for three years now.
    Happy 3rd anniversary Mrs Lee 😘(呢3年嚟都好似傻瓜一樣笑唔停,結婚3周年快樂,李太。)」仲Hashtag話時間過得好快,仲問相入面個瘦仔邊個嚟,睇嚟Phil呢3年都幸福肥咗不少!

    Phil仲打多句:「Aan Kai Sam Ngen La? See Gan Gor Det Hau Kai.」據知Phil嘅祖籍係客家,都有粉絲指出佢呢句拼音就係客家話,唔知呢句係咪Phil想同老婆講嘅甜蜜悄悄話呢?

    網民見到之後都紛紛留言恭喜佢哋,更送上祝福:「祝李杏福」,希望佢哋繼續甜甜蜜蜜!

    (綜合報道/IG)

    SHARE