【係吳君如介紹嘅?】一齊倒數睇煙花頭貼頭合照

李施嬅16年初同富商潘樹維甩拖後,感情似乎一直未有着落。噚晚佢雖然單拖去中環一間餐廳出席除夕倒數派對,但《蘋果》直擊佢原來上到餐廳,全程有西裝男陪住同佢倒數同睇煙花,兩個人仲頭貼頭咁影相㖭。

廣告

廣告

原來李施嬅係同吳君如及陳可辛一家人開party,估唔到佢哋原來咁熟。

喺餐廳度,記者見李施嬅同君如、陳可辛、着住西裝嘅Anson Cha及一男一女攞住杯酒企喺度吹水。

Anson Cha係周潤發同郭富城嘅星級健身教練。

到差不多踏入凌晨12點,全部人企晒出餐廳出面露面倒數同睇煙花,君如同家人企埋一堆,李施嬅就同Anson 企埋一齊,喺踏入2019年一刻,李施嬅攞住部手機影相自拍,身邊嘅Anson就挨埋李施嬅身邊入鏡。

後來李施嬅索性將部手機交畀其他人幫佢同Anson合照,合照時李施嬅同Anson頭貼頭好開心,不過,因為Anson身高比李施嬅矮咗少少,所以合照時李施嬅都要就吓角度。

影完一輪相之後,李施嬅同吳君如企喺露台傾偈,傾足10幾分鐘,Anson就好似觀音兵咁寸步不離企喺李施嬅身邊,又不時望住李施嬅同君如傾偈,好明顯好冧李施嬅咁。不過,凌晨12點45分李施嬅離開時,就唔見Anson喺佢身邊,兩個人最後係分開走。

李施嬅凌晨離開餐廳落到樓下,見佢有啲面紅,佢話喺樓上同朋友睇煙花倒數,但就冇透露佢其實係同君如一家人一齊玩。記者問佢點解唔同「胡說八道會」啲姊妹一齊慶祝,佢話:「定欣去咗澳門,子羚(姚子羚)要開工,豹嫂(胡蓓蔚)就要陪豹哥(單立文),Mandy(黃智雯)就陪另一半,所以分開囉,自己原本都要開工嘅,開《法證先鋒IV》,但今日停廠,所以有一日day off,可以趁機會出嚟玩,但聽日都要開工。自己《法證》做法醫,好多對白要記,所以唔敢飲太多酒,自己好清醒,清醒到可以揸車㖭呀。」

講到新一年願望,佢話希望身體健康,同埋演藝工作上希望有個突破。問佢係咪想攞獎,佢唉聲嘆氣話:「好似我喺香港冇呢個緣份,不過好開心上年喺加拿大拍咗套劇,希望今年多啲參與外國製作,o依家做緊外國casting嘅嘢,但暫時唔可以透露太多,不過幾特別嘅project,希望做到啦!算係衝出國際,無論劇同電影都有傾緊,希望成功啦,不過外國競爭大,自己唔敢抱太大expectation。」

記者講到佢拍拖問題,佢話:「定欣同子羚都係單身,我哋都仲有Baby Li(胡杏兒囝囝)玩,我哋3個group埋一個single group囉,同埋我哋3個太偏向事業,冇刻意搵另一半,不過有朋友今晚都想介紹畀我,我就覺得唔急囉,拍完劇先至諗。」噚晚記者目擊Anson成晚傍住李施嬅,估計Anson就係李施嬅口中所講,朋友介紹佢識嘅男仔,而介紹男仔佢識嘅朋友,又會唔會係君如本人呢?至於李施嬅所講嘅外國電影同電視劇,唔知會唔會係同陳可辛合作呢?

(apple daily)