陳奕迅(Eason)今年喺樂壇好活躍，除咗推出新專輯《L.O.V.E.》之外，又喺中環舉行一場慈善音樂會，Eason話：「因為我應承咗要回饋番香港。」
可能因為Eason嘅心係希望做多啲有意義同自己想做嘅事，對於獎項已經唔會太強求，所以佢今年未有現身頒獎禮，搞到有唔少fans公開尋人！
原來Eason一家三口喺聖誕同梁朝偉、劉嘉玲去咗日本滑雪，聚天倫梗係重要過攞獎，今日微博瘋傳Eason一家三口嘅相，佢哋喺日本機場畀網民捕獲，聽講Eason可能唔舒服，所以全程戴上口罩，雖然見到有人影相而覺得好無奈，但係佢都肯停低任影，阿徐同囡囡康堤都冇迴避鏡頭！
睇番啲相，今年14歲嘅康堤已經高過媽咪，遺傳晒父母嘅優良基因，搞到網民大讚100%清純！
細個已經好可愛！
(Apple daily)
