蔡少芬（Ada）同老公張晉轉眼間已經結婚十年，咁多年嚟一直都咁Sweet，大女楚兒（湯圓）依家7歲，細女信兒（包子）亦已經5歲。
Ada真係夠眼光，老公張晉由窮武指變咗做當紅武打影星，財政全權交由老婆Ada揸fit。
有傳Ada因為夠慳家，手持最少十層樓，市值過億，絕對係圈中小富婆！
Ada同張晉錫兩個女錫到燶，大女楚兒(湯圓)兩歲半時，佢哋原本住屯門獨立屋，但為咗方便小朋友喺紅磡返幼稚園，專登喺凱旋門購入一個1,200萬單位做「行宮」，真係闊綽。如今湯圓已經7歲，轉咗石門站一間國際學校讀小學，呢間學校都幾多星二代就讀，張栢芝兩個仔就係讀呢間，而卓林以前都讀過。
日前下午3點左右，Ada親自揸車去學校接湯圓放學，Ada打扮樸素，衫褲鞋都唔係名牌子，仲要素顏現身。
但45歲嘅Ada無論樣貌同身材都keep得好好，Ada見到湯圓即笑晒口，原來當時仲未放學，老師帶埋一班學生參與課外活動，去附近寫生，又到凍肉舖巡咗一圈。
湯圓全程拖住一個同學仔，而Ada就拖實囡囡，沿途幫佢哋影相，表現得仲興奮過小朋友。
期間有人認得Ada要求合照，Ada冇化妝都唔托手踭，叫湯圓企定定，佢就專心同街坊影相，非常難得，之後佢哋行返學校等放學。
(綜合報道/apple daily)
