周勵淇（Niki）去年12月突然宣佈同45歲大陸演員傅浤鳴（前名傅程鵬）結婚，被指奉子成婚，一直未有露面，Niki今日喺中環出席化妝品牌活動，左手戴上鑽戒，着上白色斜肩裙現身。
問佢會否在港補擺喜酒？Niki表示不會，因為不想大搞，故才選擇旅行結婚，而問到在哪結婚？她神秘地說：「海外，我想保持低調，由入行到依家都係，唔會特別去講，想有番私人空間。」Niki又透露只有雙方家人出席婚禮。
諸葛紫岐都有恭喜新婚嘅Niki。
Niki透露會以香港為基地居住，加上老公在港也有不少朋友，問老公改名結婚是否為免被起底？她否認：「唔係，其實改咗一段時間，因為公布結婚所以公布埋。」
傅浤鳴同前妻程愫於上海戲劇學院相識，結婚20年育有一子，曾一齊上節目分享情路，2017年3月傳離婚，去年年底傅浤鳴與Niki結婚。同Niki再婚嘅日子咁近，加上前妻程愫嘅閨密劉馨遠曾留言「會有報應」，令佢哋被冠「小三渣男」稱號，對於小三之說，Niki強調同老公拍拖到結婚嘅日子係一年內發生，佢話：「肯定唔係，好多猜測，唔多唔少都會唔開心，好難個個去解釋，完成咗人生大事，所以先同大家分享，唔係就唔係。」Niki話老公有為佢抱不平：「男人未必適應到，佢想幫我澄清，我叫佢唔使咁勞氣。」
至於老公被指「渣男」，Niki話：「佢唔係嘅話，人哋點講好難好控制，唔知點回應。結婚係開心事，有唔同聲音係預咗，唔好畀嘢影響。（婚前有冇為傳聞而擔心？）佢係結過婚、有小朋友，我好多朋友同家人都知，不過有啲朋友唔知就好surprise。我好低調，所以先唔擺酒，但之後會分批請朋友食飯。（咁快結婚了解清楚未？）快慢好難衡量，大家舒服就結婚。」問到Niki老公有乜嘢吸引？佢話：「我鍾意就得！大家好夾，好舒服就OK，唔使諗太多嘢。」
對於有報道指Niki突然宣佈結婚係奉子成婚，問佢係咪真係有咗，佢坦言：「冇，你哋睇我個肚。其實有好多唔同版本，唔緊要啦，大家猜測啫，我話畀大家知唔係，幾時有就唔知，順其自然，暫時唔好住。」
Niki想先享受二人世界，希望明年生B，問佢今年已踏入40歲，怕唔怕變高齡產婦？Niki話：「都明嘅，大家都為我好心急，時間同年紀係有限制，但唔想為呢啲而去做，一步步嚟，希望畀一年時間我。」佢亦冇考慮雪卵，目前先要調理身體。
相關新聞：
【閃婚爆奉子成婚！？】Niki周勵淇親自回應 https://goo.gl/abCx5S
【有料爆？】鍾鎮濤要祝福Niki早生貴子就立即話… https://goo.gl/HW4bU7
【有一仔 離婚3個月即與Niki相戀 】周勵淇老公大起底 https://goo.gl/um6nhG
【兜兜轉轉】39嵗Niki周勵淇宣佈已婚 https://goo.gl/zZ2GS8
(綜合報道)
