【罕有放閃】朱千雪:仲有人恭喜我

朱千雪噚晚喺金鐘出席名車發佈會,同司儀胡蓓蔚以中英語互動講解對汽車需求同介紹。

廣告

千雪BB去年底放咗近兩星期長假,同男友去咗日本玩,噚晚係2019年第一日開工,並繼續校園生活。

廣告

同男友旅遊期間,千雪BB不時將相片放上互聯網,啲相絕對係男朋友視角,千雪話:「咁啱啫,佢知我好鍾意影食物,習慣咗。」並否認刻意放閃,只係分享放假時做乜。

千雪第3年繼續修讀法律,有指佢未畢業已有大公司招手成為準律師,佢話:「唔係,我都想,都未畢業,仲有人恭喜我,唔使信晒。」學成後係咪正式淡出娛圈?千雪話:「之後再算,目標係多條路畀自己揀,公司對我好好,我好唔捨得。」

會唔會計劃結婚生仔?千雪好醒目話:「想儲錢買新車,工作行先,呢個係目標之一,入行咁耐都冇換過車。」

另外,閨密湯洛雯噚日自爆李居明批佢今年會有真命天子出現,之後仲會結婚,事實上靚湯早前就同姚子羚舊愛、「的士邦」鄭子邦傳緋聞,千雪BB話:「唔覺喎,以我所知佢單身,祝佢2019搵到真命天子,封利是俾我。」唔介意好姊妹扒頭先出嫁。

(apple daily)