王祖藍同李亞男個寶貝女Gabrielle喺上個月平安出世，其後一對新手父母晒B女手仔相宣佈喜訊。
而B女個樣近日仲頻頻曝光，爸爸祖藍琴日仲豪氣話畀囡囡正面曝光，話要光明正大添！
之前一直保密嘅二人，到BB出咗世先喺社交網公布消息，非常低調！不過原來祖藍喺老婆分娩時，就已經同大陸電視台講好拍攝迎接B女嘅過程，呢幾日節目仲正式出埋街添。
而喺琴晚播出嘅大陸綜藝節目《沒想到吧》第8季，就直擊咗祖藍錄影後，趕返香港陪老婆生B嘅紀錄。祖藍收工後，已經急急腳入房換衫，隨即上車去機場。
喺車上佢仲一路計時間幾點返到香港，先趕返屋企沖個涼，再趕去醫院陪老婆，祖藍喺片中話：「這幾天可能都在醫院裏面睡，因為她起碼要待幾天，白天又工作，不能見到她，所以只有晚上，可能到醫院裏面陪她就好，因為如果我回家睡，她就一個人在醫院裏面。」
歸心似箭嘅祖藍就算上咗飛機，都話：「希望快點去呀，快點可以看到她。」落咗機，上到接載嘅車，祖藍見到老婆已經預備好BB car seat喺車嘅後座。
佢又話：「亞男真的安排得太好了，她已經把這個（car seat）放到這裏，這些都是亞男訂的……所有事情都是她去弄，寶寶的房間、所有的衣服、迎接寶寶的party，她基本上一個人都搞定，如果沒有她，我最近就真的不知道用一個怎麼樣的心情好好的去工作。」
祖藍喺過咗午夜12點半趕到醫院。
之後再見到佢送老婆去產房，又為亞男戴好帽等，愛妻之情不言而喻。
而當時仍係準媽媽嘅亞男嘅心情似乎比祖藍輕鬆，對住鏡頭都仲可擺晒勝利手勢，睇嚟亞男好期待BB女出世呀！
(綜合報道 / appledaily)
