【珍貴如黃金!】初乳母乳冷知識


以前嘅年代,好多媽媽都會沖奶粉畀BB飲。不過,最近幾年好多媽媽都開始用最原始、最天然嘅方法去餵BB——就係人奶啦!其實做人媽咪真係唔簡單,十月懷胎之後餵母乳,都好多學問㗎!其中母乳原來都有唔同嘅種類之分!

按階段劃分:初乳、過渡乳、成熟乳

媽媽會根據BB嘅成長,身體自然調節出不同成份嘅母乳。如果按時期去劃分,主要可以分為初乳、過渡乳、成熟乳3個階段。而初乳就係指BB一出世後 3 至4日內媽媽所分泌出嘅乳汁,呈黃金色;3 至4日後嘅乳汁就稱為過渡乳;過多 3 星期左右,就會慢慢變做成熟乳啦!

初乳:母乳營養最豐富

好多人都以為初乳喺分娩後先產生,但事實上,初乳由懷孕中後期開始,就已經喺媽媽乳房裡面,等待 BB 出世!顏色呈淡黃色,質地亦油油地!重點係裡面含有天然抗體、活免疫細胞、酵素等,可以幫 BB增強免疫力,抵抗同預防疾病。初乳分量雖然只有好少,不過絕對足夠初生嬰兒嘅需要,唔需要擔心BB唔夠飽!

初乳重要的營養成份:乳鐵蛋白!

初乳除咗有以上營養之外,仲有乳鐵蛋白!點解佢咁重要?好多媽媽可能都知,小朋友好易感染腸道疾病,而乳鐵蛋白就可以幫助BB腸道黏膜生長,令佢哋嘅腸道功能完整,日後腸道自然更健康啦!另外,由於鐵係病原菌需要嘅營養素,而乳鐵蛋白可以同鐵質結合,進而抑制病原菌嘅生長繁殖,減少BB生病嘅機會!而呢種咁重要嘅成份喺過渡乳開始就會大大減少,所以好多人都勸各位媽媽要把握呢「黃金72小時」呢!

成熟乳又分前奶和後奶!

成熟乳中原來仲有分為前奶及後奶,前奶係每次哺乳時首先產生嘅乳汁,一般呈透明,含有豐富的水份、蛋白質、乳糖、維生素、無機鹽同埋具抗癌功效嘅免疫球蛋白!而後奶就係後段嘅奶,含有較多脂肪,顏色更奶白,可以為BB提供足夠熱量!

人體奧妙:按天氣、BB年齡調節

所以話母愛好偉大,睇睇人體構造就知道!因為原來媽媽身體會自我調節,畀1個月、6個月或1年嘅成份都各有不同,好似早產BB嘅媽媽就會生產較高蛋白質嘅母乳,較足月媽媽嘅母乳高5成以上!另外,母乳都會因應天氣而改變,溫度高嘅時候水份會比平時多㗎!

餵母乳:提供抗體的途徑

好多媽媽都有一個疑問,到底病會唔會傳畀小朋友?其實唔會㗎!反而媽媽生病時,身體都會製造出抗體,此時餵哺母乳也可將抗體傳畀BB,增加BB抵抗力𠻹!而其實除咗抗癌藥,大多數醫生處方藥物中,只有極少份量會進入母乳,唔會影響BB健康,媽媽們更唔應該暫停餵奶㗎!

睇完以上呢幾個冷知識,各位準媽媽就可以做好心理準備,向餵母乳之路進發啦!

延伸閱讀:【母乳教室】初乳是甚麼?前後期母乳營養冷知識