【爆今年閃婚?】唐詩詠:係一個好開始

唐詩詠昨日喺銅鑼灣出席商場嘅迎新春揭幕禮,佢喺活動上表示今年以跑到半馬為目標,藉此挑戰自己體能。

廣告
事後佢話:「首先跑到10K先,因為我0依家套新劇要打功夫,所以就去咗跑步,而且每年我都想挑戰一下自己。」會唔會約陳山聰、袁偉豪、胡諾言一齊跑?唐詩詠話:「佢哋太高層次,我唔想拖累佢哋。」

提到農曆新年將至,佢表示會放年初一至年初三,可以陪爸爸買嘢:「每年都會買對波鞋,平時叫佢買,佢唔肯,佢覺得嘥錢,唯獨是新年,佢先肯買。」對於佢之前講過有圈外追求者,會唔會趁農曆新年買嘢送畀對方?佢話:「係朋友!」

廣告

談及佢喺Instagram上載一張有佢自己、黃翠如、C君未婚妻黃天頤同一位圈外朋友嘅合照,並留言「下年(今年)呢個時候,就變成有3位可愛人妻。」

因此有傳唐詩詠自爆今年結婚,佢解畫:「嗰個圈外朋友結咗婚,第二個係翠如,第三個咪就係天頤,唔係我,我會努力啲。(新年會唔會布桃花陣?)不嬲都冇喎!定係去轉日本搵真桃花樹?」

問到現時追求者嘅呼聲高唔高?佢笑住話:「食下飯啫,每個人都有機會,唔會放棄呢啲機會,同佢可以食飯傾偈,總之係一個好開始。」笑問觀察期要幾耐?佢表示:「我0依家開劇,係一個好好嘅試煉,睇下佢接唔接受到我嘅工作時間。」佢直言冇期限畀自己,但唔排除會閃婚。

(綜合報道/apple daily)