【唱足4粒鐘】超時罰款六位數 容祖兒演出場數破紀錄

天后容祖兒(Joey)完成在紅館共19場的《PRETTY CRAZY JOEY YUNG CONCERT TOUR》演唱會,祖兒尾場唱足4小時。

祖兒更高呼:「你哋嗌幾多,我就唱幾大力,今晚早啲開騷,晏啲收工,橫掂聽日唔使開工。」果然講到做到,8時35分開騷,祖兒又唱又跳4小時,唱到凌晨12時35分才結束,連之前18場的超時罰錢 ,保守估計超過百萬。

祖兒完騷後接受訪問,她直言20周年的演出好希望有所突破,所以擔任意念總監,將自己想呈現的東西盡量表達出來,感激團隊的努力,在世界各地邀請不同的樂手、舞蹈團、雜技團等等成就今次的演出。

提到頭場因舞台機關出問題而令演出大受影響,她表示:「當日我直情係崩潰,額頭上面三條青筋都現晒出嚟,不過團隊喺後台好鼓勵我,又話嘉賓張學友等緊我,佢叫我唔好放棄,後來學友一上台我個心就定好多。」

祖兒直言由於演出場數打破自己的紀錄,每日都有南京飛來的中醫師為她的聲帶針炙,自己的腳趾因穿高跟鞋跳舞亦告受傷,需要推拿師為她拉扯腳趾的肌肉,才能如常演出,她說:「所以我已經係用盡自己全部嘅努力去演出,希望大家睇得開心。」

祖兒笑言今次演唱會入面邀請了20個單位的嘉賓,實在非常難得,她說:「雖然好多係私心位,邀請好多位巨星,都係我前輩,我想啫,都要對方肯先得呀!所以我真係知道大家好錫我,他日佢哋需要搵嘉賓的話,我會好願意做晒佢哋所有人嘅嘉賓。(首先要幫古天樂入紙?)佢簡直係要,唔只添呀,我覺得佢演戲喺電影界已經係鉅子,所以要同佢演歌舞劇先得呀!」