「牛雜妹」李美琪（Monnie）日前喺ig表示被人問價，由50萬加至100萬都不為所動，仲以「我的人生和尊嚴也不止這個價」嚟拒絕對方，今日Monnie接受周刊訪問就話呢件事已經發生喺上個星期，仲話收到呢個訊息起初以為係畀人玩：「平時都有人話想識我，但今次係第一次收到有價錢嘅飯局，一開始以為畀人玩，因為聽朋友講就聽得多，估唔到會發生喺我身上，所以都問耐啲，睇吓佢係乜人，點知佢講得出咩集團咩人，所以我都認真咁拒絕。（佢仲有冇搵你？）前一兩日仲有搵我，無話再加錢，仲話叫我考慮吓，老闆好想識我，但我真係覺得好滋擾，因為佢之前係日日咁搵我，所以我都保留採取法律行動，亦都已經同公司講咗。」
講到Monnie以「我的人生和尊嚴也不止這個價」嚟拒絕對方，問到Monnie係咪當時好嬲？佢話：「我覺得係對女性好唔尊重同好大嘅侮辱。我有同嗰個人講，你可以叫你老闆以同等嘅價錢，安排正當工作畀我。」
而其經理人亦回覆周刊表示公司會保留法律行動：「公司知道呢個消息，Monnie係一個憑住努力想得到別人認同嘅女仔。佢唔係呢一類會出席飯局嘅人，對方由50萬升到200萬，就算升到幾高佢都唔會去，公司係會保留法律行動，因為對方有講明自己係咩公司咩人，我哋都借住呢件事去保護公司旗下藝人。」
(東方日報)
