「嗰陣太太嘅睡眠質素好差，但係依然好堅持每朝陪我食早餐，慢慢仲成日頭暈，試過好多醫生都搵唔到乜嘢原因，後來有一個朋友知道，話太太嘅情況同佢家姐好相似，於是乎建議我哋睇精神科醫生。」
絕迹樂壇超過20年嘅黃翊，舊年回歸樂壇，除咗推出新歌之外，10月仲會喺九展開騷，不過黃翊呢條復出之路認真唔易行，大排檔同娛樂圈嘅工作兩邊兼顧，同時又要照顧仔仔，而且太太陳存正嘅腎病復發，試過對腳腫到啲皮膚好似裂開，而且因為排唔到毒，身體嘅毒素去到接近900，令到佢睇嘢矇查查。
黃翊之後喺訪問又表示，o依家太太需要長期洗腎，情況已經穩定。今日喺商台節目《1圈圈 星光背後》裡面，黃翊亦有透露太太嘅近況，仲好多謝大家對佢嘅關心。
當年黃翊同黃寶欣分手之後，好快就同陳存正拍拖，雖然佢哋未正式結婚，但係一直都過住好幸福嘅家庭生活。
直到05年生咗囝囝黃睿，太太嘅身體出現問題，黃翊話：「嗰陣太太嘅睡眠質素好差，但係依然好堅持每朝陪我食早餐，慢慢仲成日頭暈，試過好多醫生都搵唔到乜嘢原因，後來有一個朋友知道，話太太嘅情況同佢家姐好相似，於是乎建議我哋睇精神科醫生。」結果太太證實患上情緒病，吃飯前差唔多要食30粒藥。
唔知係咪食得西藥太多，最後發現腎臟出現問題，黃翊話：「呢個起因都係我哋推斷，最初我哋用中藥調理，點知喺宣傳新歌嘅時候，太太腎病復發，嗰一刻真係好惆悵，好彩o依家太太嘅現已經穩定，仲可以自己揸電單車！」
(蘋果日報)
