ViuTV節目《全民造星II總決賽》將於12月15日舉行，十強參賽者中午在紅磡表演拉票，吸引大批粉絲到場支持，逼爆商場。節目監製黃慧君（花姐）指今年賽制跟上屆相同，評判與觀眾投票各佔一半，除了每人有兩個自選環節，更有大會指定的跳唱環節。

問到有甚麼心水？她說：「今日嘅心水唔同平時，Oscar（20號李祉均）嘅表現改變咗我對佢嘅睇法，MC（28號張天賦）唱得好好，但係佢由開始到依家都係唱歌，咁係唔夠，佢需要突破，Mike（24號曾比特）唔係偶像派，但係唱得又跳得，Phoebus（14號吳啟洋）都幾靚仔。」

講到十強選出後惹來網民質疑，尤其是Oscar與George（74號歐鎮灝）的入選爭議最大，花姐說：「其實係今年嘅參賽者好平均，觀眾各有自己嘅鍾意，其實都係評判揀嘅，我聽到評判揀Oscar同George入圍都吓一聲，不過現場睇同睇電視唔同，好似頭先近睇Oscar個眼神好犀利，可能嗰吓電到啲評判。」

對於被指左右賽果，花姐則說：「我只係ViuTV小職員，冇能力左右大局，都係評判決定，我最多都係同評判介紹每個參賽者嘅性格。」花姐否認會將參賽者加入現有的組合，暫時未有決定，亦有可能開新組合。

(綜合報導 / on.cc)

更多報導：

歌手林欣彤（Mag）到天水圍出席活動，即場唱歌及與歌迷玩遊戲。講到月尾將舉行演唱會，她透露現時要預備演唱會，故聖誕都冇得玩。

問到何時會閉關預備個唱？她表示：「下星期開始要，臨兩星期前就要閉關。（要keep fit同練歌？）係呀，其實不嬲都有嘅。（減幾多？）冇明確減幾多，最緊要健康，我都有做運動，跑步、瑜伽等。（要練好把聲？）相信有健康嘅身體，就可以keep到把聲。」講到現時社會情況，問到可擔心演唱會會取消？她坦言：「會有心理準備，但會當如常舉行嘅心態備戰。（有兩手準備？）等公司安排，如果取消希望遲啲再開番。」

而講到好友胡鴻鈞被爆與蔡思貝秘撻，問到Mag知不知道？她笑言：「唔知。（唔會關心吓問吓佢？）好少八卦人哋嘅事，都唔關我事。（有冇聽過佢提起蔡思貝？）冇乜。（祝福佢哋？）會祝福好朋友。」

講到胡鴻鈞被爆戀情後，其同性密友許廷鏗近幾日黯然發文抒發情感，Mag笑言：「佢習慣行感性路線。（大家覺得有聯想？）一定唔關事，佢習慣Chok，配合佢嗰啲好moody嘅相。（關心吓佢？）我冇時間關心佢，我呢排不聞世事，淨係關心演唱會。」

(綜合報導 / on.cc)

更多報導：

久未露面嘅天后王菲，近年除咗演出大陸音樂節目《幻樂之城》之外，平時都只可以喺機場或者Shopping Mall見到佢，真真正正出活動都真係等到粉絲頸都長埋，尋日（7日）天后終於現身，為頂級保養品牌嘅全球代言人官宣之夜現身，佢嘅全白包頭Look更加驚艷眾人，吸引逾200萬人捕住直播睇佢見人，真係威威！

見王菲喺活動上以一身全白造型現身，不嬲都愛以潮Look示人嘅佢今次更係頭戴暗閃香檳白金頭巾，配上金色巨型耳環，妝容又夠晒簡潔自然，成個人氣息好精精靈靈，搞到網友都大讚「女神終於營業」。

仲有網友話以為佢染咗銀灰新髮色，而王菲亦一貫佢嘅寡言一面，同主持人對答言簡意賅，真係Cool到爆！

有網友就將佢今次個包頭Look同佢喺2000年出席金像獎時嘅彩色包頭Look做對比，只見王菲個樣一啲都冇變過，同19年前一樣咁Young，唔怪得網友都激讚佢保養得宜，完全睇唔出佢已經50歲啦～～

(綜合報導 / on.cc)

更多報導：

歌手吳若希（Jinny）近日受訪表明不想與同公司的菊梓喬（Hana）同台工作，又支持譚嘉儀攞獎阻Hana冧莊女歌手獎，不和傳言再度炒熱！一眾星夢歌手晚上到將軍澳電視城出席《善心滿東華2019》，合照時Jinny與Hana中間夾住連詩雅，而兩人全程零交流。

對於Jinny的言論，Hana受訪時先提及自己面部皮膚敏感，希望扯開話題，她說：「今朝洗臉後又紅又腫，眼又微絲血管爆裂，多謝化妝師幫我遮，今朝眼都擘唔大，第一次咁恐怖，都擔心影響工作，好在冇影響唱歌，但覺得自己好樣衰，聽日先睇醫生。」

問到是否被Jinny激親？Hana大方地說：「冇咩所謂，我就唔會唔想同佢做嘢。（有冇同佢傾偈？）頭先冇咩異樣，冇咩特別，我有同佢打招呼。（點解佢咁唔妥你？）我唔知，我擔心自己塊面多啲，係幾恐怖，其實入行幾年都係呢個話題，冇所謂啦！（話Jinny有同高層何哲圖講。）冇人同我講過，你見我懵懵哋就知。（同佢解釋番？）點講呀？佢平時都冇咩嘢，唔知點解咁講。（佢話你唔玩得？）唔係，我都係癲癲哋，但未有機會同佢玩啫！（佢撐譚嘉儀攞獎喎！）嘉儀係幾得人喜歡，都希望佢哋開心。」

再問是否覺得被孤立，Hana停頓了幾秒，再回答不覺得。

(綜合報導 / on.cc)

更多報導：